حکومت رواں ماہ پٹرول، گیس اور بجلی کی قیمتوں میں مزید اضافہ کرےگی، عمر ایو
اسلام آباد(نمائندہ خصوصی)پاکستان تحریک انصاف کے رہنماو سابق وفاقی وزیر عمر ایوب خان نے کہا ہے کہ موجودہ حکومت کا پاکستان سے کوئی تعلق نہیں یہ ملک تباہ کرنے نکلے ہیں، حکومت رواں ماہ پٹرول، گیس اور بجلی کی قیمتوں میں مزید اضافہ کرےگی، امپورٹڈ حکومت غفلت کی مرتکب ہورہی ہے،ملکی مسائل کا ہے فوری الیکشن کرانا ہے۔نجی ٹی وی سے گفتگو کرتے ہوئے سابق وفاقی وزیر عمر ایوب نے کہا کہ اس حکومت کا پاکستان سے کوئی تعلق نہیں یہ ملک تباہ کرنے نکلے ہیں، یہ گیس کی قیمتوں میں بھی مزید اضافہ کرنے جا رہے ہیں، پٹرول کو تقریباً 250 روپے فی لیٹر پر لیکر جائیں گے اور عوام کو بجلی میں 15 روپے کا ٹیکہ اس ماہ لگے گا۔عمر ایوب نے کہا کہ یہ حکومت صرف بیڑہ غرق کرنے بیٹھی ہے، عوام کا جینا اجیرن ہوگیا، یہ صرف ٹوپی ڈرامہ کر رہے ہیں ان کی کسی قسم کی کوئی کارکردگی نہیں، یہ سارے جوکر اکٹھے ہوگئے ہیں جنہیں پاکستان کی کوئی پرواہ نہیں، امپورٹڈ حکومت غفلت کی مرتکب ہورہی ہے۔انہوں نے کہاکہ ہمارے دور میں ریونیو آنیوالے 80 فیصد علاقوں میں زیرو لوڈشیڈنگ تھی لیکن یہ ریونیو والے علاقوں میں بھی لوڈشیڈنگ کررہے ہیں، یہ حکومت بجلی بنانے والی کمپنیوں کو پیسے ادا نہیں کررہی، نہ ادائیگیاں وقت پر کررہی ہے اور نہ امپورٹ وقت پر کررہی ہے۔انہوں نے کہاکہ یہ صرف اپنے آقاوں کا کہنا مان رہے ہیں اپنی کوئی پالیسی نہیں، ان مسائل کا واحد حل ہے کہ فوری الیکشن کرائے جائیں۔
