آغا خان اسپتال اور یونیورسٹی کا عملہ، طالبعلم بڑی تعداد میں کورونا میں مبتلا

کراچی (نمائندہ خصوصی )آغاخان اسپتال اور یونیورسٹی کا عملہ، اساتذہ اور طالبعلم بڑی تعداد میں کورونا میں مبتلا ہوگئے ہیں۔اس حوالے سے انتظامیہ نے اسپتال اور یونیورسٹی میں تمام عملے اور طالبعلموں کو بذریعہ خط الرٹ جاری کردیا ہے۔انتظامیہ کی جانب سے جاری کردہ خط میں بتایا گیا ہے کہ گزشتہ کچھ دنوں سے عملے، اساتذہ، طالبعلموں میں کورونا وائرس کی تصدیق ہو رہی ہے۔خط میں لکھا ہے کہ خوش قسمتی سے تمام افراد میں کورونا کی معمولی علامات سامنے آئی ہیں، کچھ افراد میں موسمی فلو کی علامات بھی سامنے آئی ہیں، اس سے ظاہر ہوتا ہے کہ ہمارے ماحول میں اب بھی کورونا وائرس موجود ہے۔انتظامیہ نے خط میں مزید لکھا ہے کہ نوجوان اور مضبوط قوت مدافعت والوں کو زیادہ خطرہ نہیں تاہم بزرگ افراد اپنی صحت کا خاص خیال رکھیں۔ آغاخان اسپتال انتظامیہ نے اسپتال میں ماسک پہننے کو لازمی قرار دے دیا ہے۔انتظامیہ نے یہ بھی بتایا کہ اسپتال کے عملے، اساتذہ اور طالبعلموں کے کورونا کے ٹیسٹ کیے جائیں گے اور کورونا ویکسین لگے چھ ماہ سے زائد کا عرصہ گزرنے پر بوسٹر ڈوز لگوانا ہوگا۔