اسلام آباد ( نمائندہ خصوصی) پاکستان تحریک انصاف نے کابینہ ڈویژن کی جانب سے توشہ خانہ کی تفصیلات پبلک کرنے پر ججز اور جرنیلوں کو ملنے والے تحائف کی تفصیلات جاری کرنے کا مطالبہ کرتے ہوئے کہا ہے کہ اعلی عدالتی کمیشن کے ذریعے حاصل کئے جانے والے تحائف کو گوشواروں میں ظاہر کرنے اور ان پر ٹیکسوں کی ادائیگی کی تحقیقات بھی کی جائیں۔تفصیلات کے مطابق پی ٹی آئی کے مرکزی سینئر نائب صدر فواد چوہدری نے کہا ہے کہ توشہ خانہ تفصیلات کے مطابق شریف اور زرداری خاندان نے دن دھاڑے ڈاکہ مارا،پاکستان سے دھوکہ دہی میں ملوث شریف اور زرداری خاندان کا ایک اور ثبوت سامنے آ چکا ہے۔ انہوں نے کہا کہ پچھلے 11ماہ میں عمران خان اور بشری بی بی پر الزامات کی بوچھاڑ کی گئی،عمران خان نے توشہ خانہ سے قانونی طریقہ کار کے تحت ان سب سے کم تحائف لئے۔ انہوں نے کہا کہ زرداری اور نواز شریف نے غیر قانونی طور پر توشہ خانہ سے گاڑیاں نکلوائیں،توشہ خانہ قانون کی کھلے عام خلاف ورزیاں کی گئیں۔ انہوں نے کہا کہ جو فہرست منظر عام پر آئی وہ نامکمل ہے، 1988سے تفصیلات سامنے آنی چاہئیں تھیں۔ انہوں نے کہا کہ پاکستان میں مقدس گائے کا تصور ختم کر کے ججز اور جرنیلوں کی تفصیلات بھی سامنے لائی جائیں۔ انہوں نے کہا کہ لاہور ہائیکورٹ کے چیف جسٹس کے حکم پر یہ سب ممکن ہوا ان کا شکریہ ادا کرنا چاہتے ہیں،لاہور ہائیکورٹ کے چیف جسٹس نے عوام کو ملک میں شفافیت کی نئی راہ دکھائی۔فواد چودھری نے کہا کہ لاہور ہائیکورٹ ایک کمیشن بنا کر تحقیقات کرے کہ ان تحفوں کی قیمت قانون کے مطابق ادا ہوئی؟ اور ڈکلیئر کئے گئے کہ نہیں؟
