چین کا پاکستان کے معاشی اور سماجی استحکام کی کوششوں میں تعمیری کردار ادا کرنے کےلئے تمام فریقین سے مشترکہ کوششوں کا مطالبہ

اسلام آباد (نمائندہ خصوصی )چینی وزارت خارجہ کی ترجمان ماوننگ نے کہا ہے کہ چین، پاکستان کے معاشی اور سماجی استحکام کی کوششوں میں تعمیری کردار ادا کرنے کے لیے تمام فریقین سے مشترکہ کوششوں کا مطالبہ کرتا ہے۔چینی وزارت خارجہ کے مطابق اپنی روزانہ پریس بریفنگ کے دوران ترجمان ماو ننگ سے پوچھا گیا کہ عالمی ریٹنگ ایجنسیز موڈیز اور فچ کا کہنا ہے کہ جون تک پاکستان پر 7 ارب ڈالر کا قرض واجب الادا ہے جس میں چین کے قرضے بھی شامل ہیں۔ تو کیا قرضے اتارے جائیں گے۔اس پر ترجمان وزارت خارجہ نے کہا کہ میں اس پر تفصیلات کے لیے آپ کو چینی اعلیٰ حکام سے رجوع کرنے کا کہوں گی۔ترجمان وزارت خارجہ نے کہا کہ آپ کو اپنا اصولی موقف پیش بتاتی چلوں کہ چین اور پاکستان ہمہ موسمی اسٹریٹجک اور تعاون پر مبنی شراکت دار اور آئرن برادر ہیں۔ماوننگ نے کہا کہ دونوں ممالک ہمیشہ ایک دوسرے کے دکھ سکھ میں ساتھ رہے ہیں اور ایک دوسرے کا ساتھ دیا ہے،چین پاکستان کے ساتھ قریبی اقتصادی اور مالی تعاون کرتا رہا ہے اور اقتصادی استحکام برقرار رکھنے، عوامی زندگی کو بہتر بنانے اور خود ساختہ ترقی کے حصول کے لیے اس کی کوششوں میں مدد کرتا رہا ہے۔ترجمان وزارت خارجہ نے کہا کہ میں یہ بتانا ضروری سمجھتی ہوں کہ ایک مخصوص ترقی یافتہ ملک کی بنیاد پرست مالی اور مالیاتی پالیسیاں اور ان کے سنگین اثرات پاکستان اور دیگر ترقی پذیر ممالک کو درپیش مالی مشکلات کی بنیادی وجہ ہیں۔ماو ننگ نے کہا کہ ترقی پذیر ممالک پر سب سے زیادہ قرضوں کا بوجھ مغربی زیر غلبہ تجارتی قرض دہندگان اور کثیر جہتی مالیاتی اداروں کا ہے۔انہوں نے کہا کہ چین، پاکستان کے معاشی اور سماجی استحکام کی کوششوں میں تعمیری کردار ادا کرنے کے لیے تمام فریقین سے مشترکہ کوششیں کرنے کا مطالبہ کرتا ہے۔