واشنگٹن (نمائندہ خصوصی )امریکا نے روس کے یوکرین پر حملے کو ایک سال مکمل ہونے پر روس پر نئی پابندیوں اور یوکرین کے لیے مزید فوجی امداد کا اعلان کیا ہے۔برطانوی خبر رساں ایجنسی کے مطابق گزشتہ سال سے اب تک روس یوکرین جنگ میں 42 ہزار سے زائد افراد جان سے گئے جبکہ 56 ہزار سے زائد شہری زخمی ہوچکے ہیں، اس کے علاوہ 15 ہزار افراد اب بھی لاپتہ ہیں۔یوکرین پر روس کے حملے کا پہلا سال مکمل ہونے پر امریکا کی جانب سے تازہ ترین پابندیوں میں روس اور دنیا بھر میں اس کے 100 سے زیادہ اداروں کو نشانہ بنایا گیا ہے جن میں دفاعی ساز و سامان فراہم کرنے والے ادارے اور بینک بھی شامل ہیں۔یہ پابندیاں امریکی صدر جو بائیڈن کے کیف کے اچانک دورے کے چار دن بعد لگائی گئی ہیں، جہاں انہوں نے اپنے یوکرینی ہم منصب ولادیمیر زیلنسکی سے ملاقات کی تھی۔رپورٹس کے مطابق روس پر عائد نئی پابندیوں کا مقصد ماسکو کی جنگ لڑنے کی صلاحیت کو کمزورکرنا ہے ۔علاوہ ازیں وائٹ ہاﺅ س نے اعلان کیا کہ یوکرین اور ہمسایہ ملک مالدووا کو مزید 55 کروڑ ڈالرز امداد دی جائے گی۔ اس کے علاوہ امریکی حکومت یوکرین کو نئے ڈرون سسٹم، ہائی موبلٹی راکٹ سسٹم، توپ خانے کے نظام کے لیے گولہ بارود اور کمیونیکیشن گیئر فراہم کرے گی۔
