کراچی( نمائندہ خصوصی ) صوبائی وزیر اطلاعات سندھ شرجیل انعام میمن نے کہا ہے کہ عمران خان کی نام نہاد جیل بھرو تحریک کا تماشا آج پشاور میں لگنے جا رہا ہے ، توشہ خانہ گرفتاری سے بچنے کے لیے عمران خان نے جیل بھرو تحریک کا شوشہ چھوڑا ہے ، صوبائی وزیر نے اپنے بیان میں کہا ہے کہ ڈیڑھ کروڑ سے زائد آبادی والے شہر لاھور سے کل صرف 77 لوگ کوٹ لکھپت جیل پہنچے ہیں ، پی ٹی آئی کے دھرنوں اور لانگ مارچ کی طرح جیل بھرو تحریک بھی ناکام ہوگئی ، انہوں نے کہا کہ نوٹنکی باز عمران نیازی کو چاہیے کہ تھیٹر کمپنی کھول لے ، سڑکوں اور شاہراہوں کے بجائے تھیٹر ہال میں نوٹنکی لگائے اور اپنی بھٹکتی روح کی تسکین پائے ، سڑکوں کی بندش سے شہریوں اور بالخصوص مریضوں کو شدید پریشانی کا سامنا کرنا پڑتا ہے ، شرجیل میمن نے کہا کہ عمران خان کے روز روز کے تماشوں سے میڈیا ، انتظامیہ اور قوم کا وقت ضائع ہو رہا ہے ، عوام کے اصل مسائل کے حل کے لئے جمہوری قوتوں کے ساتھ ملکر کام کرنے کے بجائے عمران خان سرکس لگائے ہوئے ہیں ، انہوں نے کہا کہ ملک میں سیلاب اور بارشوں سے تاریخی تباہی ہوئی ، لیکن نیازی جلسے جلوس اور نوٹنکی کرتا رہا ، پولیس لائن مسجد پشاور سانحہ پیش آیا ، عمران خان متاثرہ خاندانوں سے ہمدردی کے بجائے سازشوں کا راگ الاپتے رہے ، شرجیل میمن نے کہا کہ عمران خان کو قوم کا کوئی درد نہیں اور نہ ہی عوام کے مسائل میں دلچسپی ہے۔
