کراچی ( زبیر نزیرخان سے)
سابق عالمی چیمپیئن جان شیرخان کے حوالے سے وائرل ہونے والی ویڈیو کے سبب اسکواش لیجنڈ کے عزیز و اقارب اور لاکھوں چاہنے والے مداح شدید کوفت اور ذہنی اذیت کا شکار ہوگئے،جان شیر خان کے بہنوئی اور سابق کوچ محبوب خان Mehboob Khan نے رابطہ پر پشاور سے بتایا کہ جان شیرخان بخیریت و عافیت ہیں، ان کا کہناہے کہ کسی نے مسجد میں عبادت کے دوران 8 مرتبہ کے عالمی چیمپیئن اور 6 مرتبہ برٹش اوپن اسکواش چیمپئن شپ شپ جیتنے والےجان شیر خان کی ویڈیو بنا کر غلط پیغام دیا ہے، جس کی وجہ سے جان شیر خان،ان کے رشتے داروں اور محبت کرنے والوں کو سخت تکلیف اور پریشانی کاسامنا کرنا پڑا،محبوب خان کے مطابق پارکنسن کے مریض جان شیرخان ذہنی طور پر تندرست اورٹھیک ہیں تاہم ان کے گھٹنوں میں تکلیف ہے،ذہنی صحت کے حوالے سے وہ بہت بہتر محسوس کر رہے ہیں،سابق عالمی چیمپئن خدانخواستہ کسی ایسی خاص بیماری یا پریشانی میں مبتلا نہیں۔
