ماسکو۔ (نیٹ نیوز)روس کے صدر ولادیمیرپیوٹن نے کہا ہے کہ اگرروس کے خلاف مغرب کی عائد کردہ سخت پابندیاں ختم کردی جاتی ہیں تو وہ کھادوں اور غذائی اجناس کی نمایاں مقدار برآمد کرنے کوتیارہے۔ سعودی خبر رساں ادارے کے مطابق انھوں نے یہ بات ترک صدر رجب طیب اردوان سے ٹیلی فونک گفتگو کے دوران کہی ۔
روسی صدر نے کہاکہ مغربی ریاستوں کی مالیاتی اور اقتصادی پالیسیوں کے نتیجے میں عالمی غذائی منڈی میں مسائل پیدا ہوچکے ہیں اور ان مسائل کے پیش نظر اگرروس مخالف پابندیاں ختم کردی جائیں تو وہ کھادوں اور زرعی مصنوعات کی نمایاں مقدار برآمد کر سکتا ہے۔
انہوں نے کہا کہ روس یوکرینی بندرگاہوں سے اناج سمیت مال برداری کی غیرمحدود سمندری نقل و حمل کو آسان بنانے پر آمادہ ہوگا۔انھوں نے یوکرین کی صورتحال پربات کرتے ہوئے بحیرہ اسود اور ازوف میں محفوظ بحری جہاز رانی کو یقینی بنانے اور ان کے پانیوں میں بارودی سرنگوں کے خطرے کو ختم کرنے کے امور پر زوردیا ہے۔
روسی صدر نے کہا کہ روس ترک شراکت داروں کے ساتھ مل کرسامان کی بلا روک ٹوک ترسیل اور سمندری راہداری کو آسان بنانے کے لیے تیار ہے۔اس کا اطلاق یوکرینی بندرگاہوں سے اناج کی برآمد پر بھی ہوگا۔
ترک پریذیڈینسی کے مطابق ترک صدر رجب طیب اردوان نے کہا کہ اگرامن کے حصول کے لیے کوئی معاہدہ طے پا جاتا ہے توترکی استنبول میں ماسکو، کیف اور اقوام متحدہ کے درمیان ’’مشاہدہ میکانزم‘‘ کے قیام میں کردارادا کرنے کوتیار ہے
انہوں نے کہا کہ جلد ازجلد امن قائم ہونا چاہیےاور یوکرین جنگ کے خاتمے کے لیے اعتماد سازی کے اقدامات کرنے کی ضرورت ہے
