کراچی (اسٹاف رپورٹر )
آل سندھ لیڈی ہیلتھ ورکرز اینڈ ایمپلاٸیز یونین نے پبلک سروسز انٹرنیشنل اور ورکرز ایجوکيشن اینڈ ریسرچ آرگنائزیشن کے اشتراک سے ڈیسینٹ ورک اور بیٹر ہیلتھ کیٸر سروسز کے موضوع پر ہیلتھ کانفرنس کا انعقاد کیا۔ ڈاکٹر ٹیپو سلطان نے شعبہ صحت میں بے قاعدگیوں اور خصوصا لیڈی ہیلتھ ورکرز کے مساٸل پر گفتگو کرتےٕ ہوٸے کہا کہ شعبہ صحت پر بدعنوان افسران کا راج ہے۔ حقوق طشتری میں رکھ کے نہیں ملتے ۔حقوق کو چھین کر حاصل کیا جاتا ہے ۔محکمہ صحت کی خواتین کو تین تین مہینے کی تنخواہ نہیں ملتی وہ اپنا گھر کیسے چلاٸیں گی ۔شعبہ صحت میں ملازمین بہتر کارکردگی کامظاہرہ کرتے ہیں لیکن لاکھوں روپے کی تنخواہیں لینے والے افسران جو شعبہ صحت کے بجٹ پرقابض ہیں وہ حق دار کو حق دینے میں ڈنڈی مارتے ہیں ۔انھوں نے کہا کہ ہم ڈکٹیٹر کو رویں یا جمہوری حکمرانوں کو دونوں نے ہمیں مایوس کیا اور شعبہ صحت کو زبوں حالی کی طرف دھکیل دیا
شعبہ صحت کو بہتر بنانے کے لیے ضروری ہے جو لیڈی ہیلتھ ورکرز سخت اور مشکل حالات میں گھر گھر جا کر کام کررہے ہیں انکو بہتر سہولتیں دی جاٸیں۔
کانفرنس سے خطاب کرتے ہو ٸے ڈاکٹر قیصر سجاد نے کہا کہ ہمارا ملک آبادی کے لحاظ سے پانچواں بڑا ملک ہے لیکن صحت کے حوالے سے یہاں سہولیات انتہاٸی ناکافی ہے۔ حکومت اس شعبے پر ایک فیصد سے بھ کم لگاتی ہے انھوں نے کہا کہ حکومت لوگوں کو صرف صاف پانی ہی مہیا کردے تو آدھی سے زیادہ بیماریاں ختم ہوجاٸیں گی ۔ہم ایٹم بم تو بنا لیتے ہیں لیکن مچھروں کا خاتمہ نہیں کرسکتے۔ جسکی وجہ سے ہم ملیریا کے بعد اب ڈینگی کا شکار ہیں ۔انھوں نے کہا کہ چھالیہ کھانے سے پرہیز کیا جاٸے اس سے کینسر جیسی بیماری پیدا ہوتی ہے۔ ڈاکٹر عاصم خان نے اپنے خطاب میں کہا کہ کووڈ کی وجہ سے بھی ہمارا صحت کا شعبہ بہت متاثر ہوا۔ سندھ کی آبادی میں تواتر سے اضافہ ہورہا ہے۔ان چیلنجز کا مقابلہ کرنے کے لیے ہیلتھ پالیسی کو ڈیزائن کیا جاٸے۔انھوں نے کہا کہ صوبے میں نٸے ہسپتال ہیلتھ سینٹرز بناٸے جاٸیں۔ سینٸر صحافی شہر بانو نے کہا کہ ہمارے معاشرے میں خواتین کو ہر شعبے میں مشکلات کا سامنا کرنا پڑتا ہے۔ خواتین کے صحت کے معاملات بھی سہولیات نہ ہونے کی وجہ سے پیچیدہ ہوتے گٸے۔ جس لڑکی کو ابھی گڑیا سے کھیلنا ہوتا ہے اسکی شادی جلدی کردی جاتی ہےاور اس کےبعد گڑیا کے جگہ اسکی گود میں بچہ آجاتا ہے ۔ ہسپتال کم ہونے اور دور دراز کے علاقوں میں ہسپتال ہونے سے مریضوں اور خاص کر زچہ خواتین کو شدید مشکلات کا سامنا کرنا پڑتا ہے۔ حکومت کو ان معاملات کو دیکھنا ہو گا۔ شمع گلالی نے یونین کے مساٸل پر بات کرتے ہوٸے کہاکہ ہمارا سیکورٹی رسک الاونس ختم کردیا گیا ہے ہماری لیڈی ورکرز ہر مشکل حالات میں کام کررہی ہیں۔ یونین کی صدر حلیمہ لغاری نے کہا کہ ہمارے ہزاروں ساتھی ریٹاٸرڈ ہوکر گھر بیٹھ گیے انھیں ابھی تک پینشن نہیں دی گٸی۔ ہم پاکستان کو ایک صحت مند قوم دے رہے ہیں ہم کوٸی ناانصافی برداشت کریں گے ۔میر ذوالفقار علی نے تمام شرکاء کا شکریہ ادا کرتے ہوٸے کہا کہ جو آگاہی آپ لوگوں نے حاصل کی ہے اسے دوسروں تک بڑھاٸیں۔۔۔
