کوئٹہ( نمائندہ خصوصی) بلوچستان پولیس حکام نے حق دو تحریک کے دھرنے کے حوالے سے جاری اپنے بیان میں کہا ہے کہ کسی بھی جتھے کو گوادر کا امن خراب کرنے کی اجازت نہیں دی جائے گی۔ترجمان بلوچستان پولیس نے گوادر میں حق دو تحریک کے دھرنے سے متعلق اپنے مؤقف میں کہا ہے کہ حق دو تحریک کے دھرنے نے ایک مشتعل ہجوم کی شکل اختیار کرلی ہے۔ترجمان نے کہا کہ مشتعل ہجوم نے ڈی آئی جی آفس گوادر پر پٹرول بم پھینکے اور پرتشدد کارروائیوں میں متعدد اہلکاروں کو زخمی کیا، پولیس گوادر میں امن و امان بحال کرنے کے لئے اپنا ہرممکن کردار نبھائے گی۔
پولیس حکام کا کہنا ہے کہ عوام کا حق احتجاج تسلیم کرتے ہوئے دھرنے کے شرکاء کو ہرممکن سیکیورٹی فراہم کی گئی، تاہم کسی بھی ہجوم کو گوادر کا امن خراب کرنے کی اجازت نہیں دی جاسکتی۔ترجمان پولیس نے واضح کیا کہ کسی مشتعل جتھے کو گوادر میں امن و امان خراب کرنے نہیں دیا جائے گا، گوادر کے شہریوں سے اپیل ہے کہ قیام امن کی کوششوں کو خراب کرنے کی سازش کا حصہ نہ بنیں۔
