بیلہ ( نمائندہ خصوصی )
لسبیلہ میں سلنڈر پھٹنے کے واقعے کے مزید 2 زخمی دم توڑ گئے جس کےبعد اس سانحے میں جاں بحق افراد کی تعداد 14 ہوگئی ہے۔سول اسپتال کے برنس وارڈ انتظامیہ کے مطابق لسبیلہ سلنڈر دھماکے میں جھلس کر زخمی ہونے والے افراد میں سے مزید دو زخمی دم توڑ گئے ہیں جس کے بعد اس سانحے میں جاں بحق افراد کی تعداد 14 ہوگئی ہے جب کہ متعدد افراد تاحال زیر علاج ہیں جن میں سے کئی کی حالت تشویشناک بتائی جاتی ہے۔ذرائع کے مطابق منگل کی علی الصبح لسبیلہ کے شہر بیلہ میں چونگی منی بس اسٹاپ پر دکان میں سلنڈر پھٹنے سے زور دار دھماکا ہوا جس کے نتیجے میں موقع پر ہی 2 افراد دم توڑ گئے تھے جب کہ درجنوں زخمی ہوئے تھے۔
دھماکا اتنا شدید تھا کہ اس سے اطراف کی 7 دکانیں، ہوٹل تباہ ہوگئے جب کہ وہاں کھڑی 25 موٹر سائیکلیں جل گئیں۔ دھماکے کے بعد وہاں زخمیوں کی چیخ وپکار شروع ہوگئی۔دھماکے کی اطلاع ملتے ہی پولیس، سیکیورٹی فورسز اور ریسکیو اہلکار جائے حادثہ پر پہنچ گئے اور امدادی سرگرمیاں شروع کردیں۔ریسکیو ذرائع کے مطابق سلنڈر دھماکے کے 25 سے زائد زخمیوں کو ایمبولینسوں کے ذریعے کراچی کے سول اسپتال کے برنس وارڈ منتقل کیا گیا جہاں دوران علاج مزید 12 افراد جان کی بازی ہار گئے جب کہ باقی زخمیوں میں بھی کئی کی حالات تشویشناک ہے۔
ایم ایس سول اسپتال ڈاکٹر روبینہ بشیر نے کہا ہے اسپتال لائے جانے والے زیادہ تر زخمی 70 سے 90 فیصد تک جھلسے ہوئے ہیں۔پارلیمانی سیکریٹری صحت سندھ قاسم سومرو کا کہنا ہے کہ سلنڈر دھماکے کے واقعے کے 26 زخمیوں کو سول اسپتال کراچی کے برنس وارڈ منتقل کیا گیا۔ مرنے والوں کی عمریں 20 سے 40 سال کے درمیان ہیں۔
ان کا کہنا ہے کہ زخمیوں کو بہتر طبی سہولتیں فراہم کرنے کی کوشش کر رہے ہیں جب کہ وزیر اعلیٰ بلوچستان جام کمال نے
بھی سول اسپتال کے برنس وارڈ کا دورہ کیا ہے۔
