مکہ مکرمہ: غار حرا اور جبل نور خوبصورت قرآنی آیات سے روشن

ریاض( نمائندہ خصوصی) سعودی عرب کے مقدس شہر مکہ مکرمہ میں جبل نور کو خوبصورت قرآنی آیات سے روشن کردیا گیا، جبل نور کا غار حرا وہ مقام ہے جہاں حضور اکرم ﷺ پر پہلی وحی نازل ہوئی تھی۔ذرائع کے مطابق سعودی عرب میں مکہ مکرمہ کے غار حرا (جبل نور) کو قرآنی آیات سے منور کردیا گیا، اس کا اہتمام پہاڑوں کے عالمی دن کی مناسبت سے کیا گیا۔روشنی کے پس منظر کے ساتھ قرآنی آیات مکہ مکرمہ آنے والے زائرین کو اپنی طرف متوجہ کر رہی ہیں۔اس مقصد کے لیے قرآن پاک کی ان آیات کا انتخاب کیا گیا ہے جس میں مختلف حوالوں سے پہاڑوں کا تذکرہ موجود ہے، غار حرا (جبل نور) وہ مقام ہے جہاں نبی کریم ﷺ پر پہلی وحی نازل ہوئی تھی۔پہاڑوں کے عالمی دن کی مناسبت سے حرا کلچرل ڈسٹرکٹ پروجیکٹ کا بھی باقاعدہ افتتاح کیا جا رہا ہے۔خیال رہے کہ حرا ڈسٹرکٹ 67 ہزار مربع میٹرسے زائد رقبے پر قائم کیا گیا ہے، جس میں زائرین کے لیے مرکز بھی قائم کیا گیا ہے جبکہ غار حرا جانے والی سڑک، قرآن کریم عجائب گھر اور وحی کے موضوع پر نمائش گاہ کا اہتمام بھی کیا گیا ہے۔حرا کلچرل ڈسٹرکٹ کا دوسرا اہم مقام القرآن الکریم عجائب گھر ہے جس میں جدید ٹیکنالوجی کی مدد سے قرآن کریم کا خوبصورت تعارف دیا گیا ہے، کتاب اللہ کے قلمی نسخوں کو پرکشش انداز میں دکھایا گیا ہے۔