اسلام آباد۔ (اسپورٹس ڈیسک/اے پی پی):وفاقی وزیر برائے منصوبہ بندی ، ترقی ، اصلاحات و خصوصی اقدامات پروفیسر احسن اقبال نے کہا ہے کہ ملک میں صوبائی حکومتوں کے ساتھ مل کر سپورٹس کمپلیکسز تعمیر کرنے کا منصوبہ بنا رہے ہیں،عالمی اولمپک ایسو سی ایشن کے تعاون سے سپورٹس فیڈریشنوں میں شفافیت لائی جائے گی ۔
ان خیالات کااظہارانہوں نے ہفتے کو اپنی زیر صدارت نوجوانوں اور کھیل کے حوالے سے کئے جانے والے اقدامات پر اجلاس میں گفتگو کرتے ہوئے کیا۔ اجلاس میں معاون خصوصی برائے یوتھ افئیرز ، چئیرمین ہائیر ایجوکیشن کمیشن ، نیو ٹیک اور وزارت بین الصوبائی ہم آہنگی کے افسران نے شرکت کی۔ وفاقی وزیر نے کہا کہ حکومت نوجوانوں کے لئے بجٹ میں خصوصی پروگرام شروع کر رہی ہے ، صوبائی حکومتوں کے ساتھ مل کر ملک بھر میں سپورٹس کمپلیکسز تعمیر کرنے کا منصوبہ بنا رہے ہیں ،
گزشتہ حکومت نے سپورٹس کے منصوبے تباہ کئے ۔ انہوں نے کہا کہ اولمپک کھیلوں میں ناقص کارکردگی پر پاکستان اولمپک ایسوسی ایشن کی جواب طلبی ہونی چاہیئے ، عالمی اولمپک ایسو سی ایشن کے تعاون سے سپورٹس فیڈریشنوں میں شفافیت لائی جائے گی۔ان کا کہنا تھا کہ پی ایس ڈی پی میں نوجوانوں کے لیے فنی تربیت اور سٹارٹ اپ ماحول کو ترقی دینے کے منصوبوں کو شامل کیا جائے گا
