کراچی(نمائندہ حصوصی)
صوبائی وزیر ٹرانسپورٹ شرجیل انعام میمن کی زیر صدارت بی آر ٹی ریڈ لائن پروجیکٹ سے متعلق کے الیکٹرک سمیت یوٹلٹی کمپنیوں کے افسران کے ساتھ اجلاس منعقد ہوا ۔اجلاس میں سیکریٹری ٹرانسپورٹ عبدالحلیم شیخ، کمشنر کراچی محمد اقبال میمن، سی ای او ٹرانس کراچی واصف اجلال ، کے الیکٹرک کے منیر احمد شیخ ، پی ٹی سی ایل ، سوئی سدرن گیس کمپنی کے نمائندوں اور دیگر نے بھی شرکت کی۔ اس موقع پر شرجیل انعام میمن نے کے الیکٹرک کی جانب سے یوٹیلیٹیز کی منتقلی میں سست روی پر سخت برہمی کا اظہار کیا ۔ شرجیل انعام میمن نے کہا کہ عوامی مفاد کے منصوبے کی تکمیل کے لئے کے- الیکٹرک اپنی زمہ داریاں بروقت ادا کرے ۔ بی آر ٹی ریڈ لائن مفاد عامہ کا اہم پروجیکٹ ہے،کے الیکٹرک کی وجہ سے پروجیکٹ میں کسی قسم کی سست روی برداشت نہیں کر سکتے ۔ صوبائی وزیر نے سیکرٹری ٹرانسپورٹ ، کمشنر کراچی اور سی ای او ٹرانس کراچی کو کل سی ای او کے الیکٹرک کے ساتھ اجلاس کر کے تمام انسٹالیشن کی منتقلی کے معاملات حل کرنے کی ہدایت کی ۔ صوبائی وزیر نے کے۔ الیکٹرک کو بی آر ٹی ریڈ لائن پروجیکٹ کے لئے کے الیکٹرک کی طرف سے پروجیکٹ منیجر تعینات کرنے کی بھی ہدایت کرتے ہوئے کہا کہ پروجیکٹ منیجر روزانہ کی بنیاد پر ریڈ لائن پروجیکٹ کوریڈور سے کے الیکٹرک کی انسٹالیشن کی منتقلی کے کام کی رفتار کو تیز کرے ۔ صوبائی وزیر نے کراچی انتظامیہ کو بی آر ٹی ریڈ لائن پروجیکٹ کے کوریڈور میں آنے والی تمام تجاوزات 7 روز کے اندر ہٹانے کے بھی احکامات دیئے۔ انہوں نے کہا کہ محکمہ ٹرانسپورٹ پبلک ٹرانسپورٹ کے پروجیکٹس کی وقت پر تکمیل کے لیے دن رات کوشاں ہے ۔ انہوں نے ٹرانس کراچی کو ہدایت دی کہ ریڈ لائن پروجیکٹ پر متبادل راستوں کو بہتر طریقے سے بنایا جائے ، تاکہ شہریوں کو پریشانی نہ ہو ۔
