نیب قومی اسمبلی میں ہونے والی جعلی بھرتیوں پر کارروائی کرے۔ شرجیل انعام میمن عمران خان جتنی بھی کوششیں کر لیں قوم کو تقسیم ہونے نہیں دیں گے۔ صوبائی وزیر اطلاعات سندھ

صوبائی وزیر اطلاعات سندھ شرجیل انعام میمن نے مطالبہ کیا ہے کہ قومی اسمبلی سیکرٹریٹ میں جو بھی جعلی بھرتیاں کی گئی ہیں، نیب حکام اس پر کارروائی کرے, تاکہ اصل حقائق عوام کو معلوم ہو سکیں۔ صوبائی وزیر نے کہا کہ عمران خان جھوٹے بیانیہ کے پیچھے چھپ نہیں سکتے اور ملک کی 22 کروڑ عوام اب ان کے جھانسے میں نہیں آئے گی ۔ صوبائی وزیر نے کہا کہ عمران خان کے ہیلی کاپٹر کیس کی تحقیقات سامنے لائی جائے۔ اور بی آر ٹی کے پی کے، مالم جبہ سمیت پی ٹی آئی کے تمام اہم اسکینڈلز کا احتساب ہونا چاہیے۔ انہوں نے کہا کہ توشہ خانہ میں ڈکیتی کا حساب عمران خان سے ضرور لیں گے۔ عمران خان جتنی بھی کوششیں کر لیں قوم کو تقسیم ہونے نہیں دیں گے۔ شرجیل انعام میمن نے کہا کہ پی ٹی آئی جلد اپنے انجام کو پہنچنے والی ہے ۔ فارین فنڈنگ کیس سے بھاگنے کے جتنے بہانے کر لے ، عمران نیازی اور ان کے حواریوں کا کھیل ختم ہونے والا ہے ۔ ملک کی جتنی تباہی گذشتہ تین سالوں میں ہوئی ہے ، اس کی نظیر ملک کی تاریخ میں نہیں ملتی ۔ صوبائی وزیر اطلاعات
نے کہا کہ پاکستان کے 22 کروڑ عوام نے یو ٹرن چیپمینز کی کارکردگی دیکھ لی۔ اب ان کے جھانسے میں نہیں آئے گی ۔ شرجیل میمن نے کہا کہ تحریک انصاف نہیں یہ تحریک انتشار پارٹی ہے ، جس نے 2014 سے ملک میں بدتمیزی اور گالی کو فروغ دیا ہے ۔