پاکستان پیپلز پارٹی کے چیئرمین بلاول بھٹو زرداری نے مادرِ جمہوریت بیگم نصرت بھٹو کو ان کے 93 ویں یومِ ولادت پر شاندار الفاظ میں خراج عقیدت پیش کیا ہے۔
میڈیا سیل بلاول ہاوَس کی جانب سے جاری کردہ بیان کے مطابق، پی پی پی چیئرمین نے اپنے پیغام میں کہا کہ قوم کے بنیادی سیاسی حقوق کی خاطر اپنے ذاتی المناک صدمات کو بُھلا کر غیرمتزلزل عزم و استقلال کے ساتھ جدوجہد کرنے کا نام بیگم نصرت بھٹو ہے۔ انہوں نے کہا میری نانی نے ہمیں آٸین شکن مجرموں کے خلاف مزاحمت کرنا اور انہیں شکست سے ہمکنار کرنا سکھایا۔
چیئرمین بلاول بھٹو زرداری نے کہا کہ بیگم نصرت بھٹو انتہائی بہادر اور باوقار شخصیت کی مالک خاتون تھیں۔ یہ منفرد اعزاز بھی انہیں قدرت نے دیا ہے کہ ایک طرف وہ ایک وزیراعظم کی بہو، پاکستان کے پہلے منتخب وزیراعظم کی اہلیہ اور اسلامی دنیا کی پہلی منتخب خاتون وزیراعظم کی والدہ ہیں، تو دوسری جانب وہ لاکھوں جیالوں اور کروڑوں محب وطنوں کے لیئے ‘مادرِ جمہوریت’ ہیں۔ انہوں نے مزید کہا کہ بیگم نصرت بھٹو کی جدوجہد و قربانیاں بے مثال اور اس کے ردعمل میں عوام کی ان سے محبت بھی لازوال ہے۔
پی پی پی چیئرمین نے اس عزم کا اعادہ کیا کہ پاکستان پیپلز پارٹی اپنی پہلی خاتون چیئرپرسن، بیگم نصرت بھٹو، کی پیروی کرتے ہوئے، تمام تر مشکلات کے باوجود ملکی آئین کے تحفظ اور جمہوریت کو مضبوط بنانے کی جدوجہد کو جاری رکھے گی۔
