لاہور(بیورورپورٹ )
چیف ایگزیکٹیو آفیسر پاکستان ریلوے فرخ تیمور غلزئی نے کہا ہے کہ شدید بارشوں کی وجہ سے ٹرینوں کا شیڈول متاثر ہوا ہے۔ سیلابی صورتحال قابو میں آتے ہی ٹرینوں کی آمدورفت کے اوقات بحال ہونا شروع ہو جائیں گے۔
انہوں نے کہا کہ ملک بھر میں ریکارڈ بارشوں سے ریلوے ٹریکس اور سگنلنگ کا نظام بری طرح سے متاثر ہوا ہے۔ بعض علاقوں میں پورے پورے ٹریکس پانی کے اندر ڈوبے ہوئے ہیں۔ ایسی صورت حال میں ٹرین چلانا کسی خطرے سے خالی نہیں۔ فرخ تیمور غلزئی نے کہا کہ ہماری پہلی ترجیح مسافروں کے لیے محفوظ سفر کو یقینی بنانا ہے۔ ریلوے لائن پر پانی کی موجودگی میں ایک خاص رفتار سے تیز گاڑی نہیں چلا سکتے۔
اسی وجہ سے ٹرینیں اپنے مقررہ اوقات پر نہیں پہنچ رہیں۔ انہوں نے کہا کہ ہمیں مسافروں کی پریشانی کا علم ہے، اور ہم دن رات اس کوشش میں ہیں کہ شیڈول جلد معمول پر آ جائے۔