کراچی( بیورو رپورٹ ) پاکستان سول ایوی ایشن اتھارٹی(سی اے اے)نے ملک بھر میں زمینوں پر قبضے چھڑانے کیلئے بڑا فیصلہ کرلیا ہے۔ذرائع کے مطابق سی اے اے نے ملک میں ایئرپورٹس کی زمینوں کا سروے کرنے کا فیصلہ کیا ہے،کراچی، اسلام آباد، لاہور سمیت ملک بھر میں سی اے اے کی زمینوں سے متعلق سروے کا کام جاری ہے۔سی اے اے ذرائع نے بتایاکہ پہلے مرحلے میں کراچی میں پاکستان سی اے اے کی زمینوں کا سروے کیا جارہا ہے، سی اے اے نے زمینوں کے سروے کا کام سروے آف پاکستان کے حوالے کردیا ہے۔
ذرائع نے بتایا کہ کراچی کے بعد ملک کے تمام شہروں میں سی اے اے کی زمینوں کا سروے ہوگا جبکہ سی اے اے کا شعبہ اسٹیٹ سروے آف پاکستان سے کوآرڈینیشن کر رہا ہے، سروے میں تکنیکی طور پر اسیٹلائٹ امیجز حاصل کرکے سی اے اے کی زمینوں کا تعین کیا جائے گا۔ذرائع کے مطابق سروے ملک بھر میں سی اے اے کی زمینوں پر قبضے ہونے کے انکشافات کے بعد کرنے کا فیصلہ کیا گیا، کراچی میں سی اے اے کی زمینوں پر سروے کا کام 25 اگست تک مکمل کرنے کا ٹاسک دیا گیا ہے۔سی اے اے ذرائع نے بتایاکہ کراچی، حیدرآباد، لاہور، اسلام آباد میں سی اے اے کی زمینوں پر قبضوں کے انکشافات کے بعد سروے کرانے کا فیصلہ کیا گیا ہے۔واضح رہے کہ ڈی جی سی اے اے نے سروے کرانے کی منظوری دی تھی۔