لاہور(نمائندہ خصوصی) الیکشن کمیشن نے صوبہ پنجاب میں قومی اسمبلی کے 6حلقوں میں ہونےوالے ضمنی انتخابات کے لئے مانیٹرنگ ٹیمیں تعینات کر دیں، ڈسٹرکٹ مانیٹرنگ افسران کی سربراہی میں یہ ٹیمیں اپنے فرائض سرانجام دیں گی۔
ترجمان الیکشن کمیشن پنجاب کے مطابق مانیٹرنگ ٹیمیں امیدواروں کی انتخابی مہم کو مانیٹر کریں گی اور ضابطہ اخلاق کی خلاف ورزیوں پر فوری ایکشن لیں گی۔
ان کا کہنا تھا کہ مانیٹرنگ ٹیمیں ضابطہ اخلاق پر عملدرآمد کو یقینی بنائیں گی، اس کی خلاف ورزی کو کسی صورت نظر انداز نہیں کیا جا ئے گا اور اس کا ارتکاب کرنے والوں کو قانون کے مطابق فوری سزا دی جائے گی۔ ترجمان کے مطابق مانیٹرنگ ٹیمیں روزانہ کی بنیاد پر رپورٹ الیکشن کمیشن کو بھیجیں گی۔