کوئٹہ (بیورورپورٹ) کمانڈر کوئٹہ کور لیفٹیننٹ جنرل سرفراز علی نے ڈیرہ بگٹی میں عوام سے خطاب میں ہر قیمت پر ریاست کی رٹ بحال رکھنے کے عزم کا اظہار کیا ۔ جنرل سرفراز علی نے کہا کہ ریاست ماں کی صورت ہے۔ قومی دھارے میں شامل ہونے والوں کو خوش آمدید کہیں گے مگر اس کی آڑ میں کسی گروہ کو مراعات لوٹنے اور بدمعاشی کی اجازت ہر گز نہیں دی جائے گی۔ بلوچستان میں طلوع ہوتا ہوا امن و خوشحالی کا سورج بد خواہوں اور نا عاقبت اندیشوں بہکاوے میں آئے لوگوں کو دعوتِ فکر دے رہا ہے کہ آئیں اور اصولی سیاسی جد وجہد کے ذریعے صوبے کی بہتری کے لیے اپنا تعمیری کردار ادا کریں۔
کور کمانڈر نے جمعہ کے روز ڈیرہ بگٹی میں مصروف دن گزارا ۔ اس موقع پر آئی جی ایف سی بلوچستان نارتھ میجر جنرل محمد یوسف مجوکہ بھی ان کے ساتھ تھے- ڈی سی آفس میں علاقے کے معززین اور قبائلی عمائدین سے ملاقات میں جنرل سرفراز نے کہا کہ جنگیں فوجیں نہیں بلکہ قومیں لڑتی ہیں ۔ علاقے میں پائیدار امن اور خوشحالی کے لیے لازم ہے کہ عوام سیکورٹی فورسز کے ہاتھ مضبوط کریں اور انتشار پھیلانے اور استحصال کرنے والوں کے خلاف کھڑے ہو جائیں۔ سیکیورٹی فورسز کی تمام تر کاوشوں اور قربانیوں کا مقصد علاقے کے عوام کی حفاظت اور تعمیر و ترقی کے لیے سازگار ماحول کی فراہمی ہے۔
عوام کی جانب سے علاقے میں طبی سہولیات کی عدم دستیابی کے شکوے کے پیشِ نظر کور کمانڈر نے پاک فوج کی جانب سے ایک مرکزِ علاج ڈیرہ بگٹی میں قائم کرنے کا اعلان کیا۔
کور کمانڈر نے کہا کہ ہمارے بچے ہمارا مستقبل ہیں اور ان کو بہتر مستقبل دینا ہماری اجتماعی ذمہ داری ہے۔ جنرل سرفراز نے کہا کہ کیڈٹ کالجز میں سب سے پہلے اور سب سے زیادہ مقامی نوجوانوں کو تعلیم کے مواقع فراہم کئے جائیں گے۔ اس کے ساتھ ساتھ آرمی اور ایف سی پبلک اسکولوں میں بھی مقامی طلبا و طالبات کو زیادہ سے زیادہ مفت تعلیم کی سہولت دی جائے گی۔
بعد ازاں کور کمانڈر ڈیرہ بگٹی کے بازار میں عوام کے ساتھ گھل مل گئے ۔ لوگ کور کمانڈر کو اپنے ساتھ پا کر بہت خوش ہوئے اور انہوں نے امن و امان کی بحالی اور علاقے کی بہتری کے لے افواج پاکستان کے کردار کو سراہا اور اپنے بھرپور تعاون کا یقین دلایا۔
اس کے بعد کور کمانڈر تحصیل پھلواغ کے قصبے بیکر گئے جہاں انہوں نے سینیٹر سرفراز بگٹی اور عوام الناس سے ملاقات کی۔ آخر میں جنرل سرفراز نے بیکر میں زیر تعمیر ہسپتال کا بھی دورہ کیا اور امید ظاہر کی کہ اس کی جلد تکمیل سے علاقے کے عوام کو علاج معالجے کی سہولیات میسر آئیں گی
