سعودی عرب میں کورونا وائرس سے بچاؤ کے لیے وزارت صحت کی جانب سے ایسے افراد جنہوں نے ویکسین کی دوسری خوراک آٹھ ماہ قبل لگائی تھی، کے لیے بوسٹر ڈوز لازمی قرار دی گئی ہے۔
بوسٹر ڈوز نہ لگوانے والوں کا توکلنا ایپ پر امیون کا اسٹیٹس ختم ہو جاتا ہے جس کے بعد وہ کسی سرکاری یا نجی ادارے کے علاوہ مارکیٹوں و عوامی مقامات پر نہیں جا سکتے۔
ویکسین کے حوالے سے سفری پابندیوں کے بارے میں ایک شخص نے جوازات کے ٹوئٹر پر دریافت کیا کہ امارات سے آنے والے غیر ملکی جنہوں نے بیرون مملکت سے ویکسین لگوائی ہوں۔ کیا انہیں سعودی عرب آنے پر قرنطینہ کرنا پڑے گا؟
اس پر جوازات کا کہنا تھا کہ وزارت صحت کے ضوابط کے مطابق مملکت آنے والے ایسے افراد جنہوں نے ویکسین کی دونوں خوراکیں مملکت میں لگوائی ہیں انہیں مملکت آنے کے بعد قرنطینہ کی ضرورت نہیں۔
ایسے مسافر جنہوں نے مملکت میں ویکسین کی دونوں خوراکیں نہیں لگوائیں وہ سعودی عرب آنے کے بعد پانچ دن قرنطینہ کریں گے۔
ایسے مسافروں کو مملکت آتے ہی پی سی آر ٹیسٹ کرانا ہوگا جبکہ قرنطینہ کے پانچویں روز بھی پی سی آر ٹیسٹ کرانا ہوگا۔ جس کی رپورٹ منفی آنے پر قرنطینہ ختم کیا جا سکے گا۔
واضح رہے سعودی وزارت صحت کی جانب سے مملکت میں کورونا وائرس سے بچاؤ کے لیے فائزر، اسٹرازینیکا، موڈرنا اور جانسن اینڈ جانسن ویکسینز لگائی جا رہی ہے۔
سائنوویک اور سائنوفام ویکسینز جنہیں عالمی ادارہ صحت نے منظور کیا ہوا ہے، سعودی وزارت صحت نے ان کی بھی اجازت دی ہوئی ہے تاہم انہیں دیگر ممالک میں لگایا جاتا ہے۔
وزارت صحت کے مطابق مملکت میں ویکسین نہ لگوانے والے مسافروں کو سعودی عرب آنے کے بعد ویکسین کی بوسٹر ڈوز دی جاتی ہے جس کے بعد توکلنا پر ان کا اسٹیٹس امیون ہوتا ہے۔
ایک شخص نے جوازات سے دریافت کیا کہ ویکسین کی دوسری خوراک لگوائے تین ماہ گزرے ہیں بوسٹر ڈوز کے بغیر بیرون مملکت سفر کیا جاسکتا ہے؟
اس حوالے سے جوازات کا کہنا تھا کہ بیرون مملکت سفر سے زیادہ سے زیادہ 48 گھنٹے قبل پی سی آر ٹیسٹ اور کارآمد خروج وعودہ درکار ہوگا۔
واضح رہے کہ وزارت صحت کے ضوابط کے تحت ایسے افراد جنہوں نے ویکسین کی دوسری خوراک آٹھ ماہ قبل لگوائی ہے ان کے لیے لازمی ہے کہ وہ بوسٹر ڈوز لگوائیں۔
جو افراد بوسٹر ڈوز کے اہل نہیں ان کا توکلنا پر اسٹیٹس امیون ہوتا ہے، بوسٹر ڈوز لگانے کے لیے توکلنا یا صحتی ایپ پر اپائنٹمنٹ حاصل کرنی ہوتی ہے، پیشگی وقت حاصل کرنے کے بعد مقررہ ٹائم پرسینٹر پہنچ کر ویکسین کی بوسٹر ڈوز لگوائی جاتی ہے۔
ایسے افراد جو بوسٹر ڈوز کے اہل نہیں ہوتے ان پر سفری پابندی کے لیے بوسٹر ڈوز کی ضرورت نہیں ہوتی تاہم انہیں سفر سے 48 گھنٹے قبل پی سی آر ٹیسٹ کرانا ہوگا۔
