اسلام آباد۔(نمائندہ خصوصی):وزیراعظم محمد شہباز شریف نے رواں مالی سال کے پہلے 9 ماہ میں آئی ٹی برآمدات میں 23 فیصد اضافے کا خیر مقدم کرتے ہوئے کہا ہے کہ آئی ٹی برآمدات 2.828 ارب ڈالر کی تاریخی سطح پر پہنچ چکی ہیں، حکومت آئی ٹی برآمدات اور بیرون ملک خدمات کی فراہمی کے لئے پاکستانی ماہرین کی تعداد میں اضافے کے لئے کوشاں ہے۔جمعہ کو وزیراعظم آفس کے میڈیا ونگ سے جاری اعلامیہ کے مطابق ایک بیان میں وزیراعظم نے کہا کہ حکومت کی جانب سے آئی ٹی 
شعبے کو سہولیات کی بروقت و فوری فراہمی سے شعبے کی برآمدات میں 23 فیصد اضافہ ہوا، خوش آئند ہے کہ آئی ٹی شعبے سے منسلک کاروباری افراد نے حکومتی پالیسیوں سے مستفید ہو کر روایتی مارکیٹوں کے ساتھ ساتھ نئی مارکیٹوں میں اپنی خدمات برآمد کیں۔وزیراعظم نے کہا کہ آئی ٹی برآمدات میں اضافہ حکومتی ٹیم کی انتھک محنت کی وجہ سے ممکن ہوا، حکومت آئی ٹی برآمدات اور بیرون ملک آئی ٹی شعبے میں خدمات فراہم کرنے کے لئے پاکستانی ماہرین کی تعداد میں اضافے کےلئےکوشاں ہے۔ وزیراعظم نے کہا کہ آئی ٹی شعبے کی ترقی اور برآمدات میں اضافے کیلئے پیشہ ورانہ تربیت کے حوالے سے اقدامات کر رہے ہیں۔
وزیراعظم شہباز شریف کا آئی ٹی برآمدات میں 9 ماہ کے دوران 23 فیصد اضافے کا خیر مقدم
