مریم نواز شریف کے پنجاب دھی رانی پروگرام : کرکٹ اسٹیڈیم راجن پور میں 75 اجتماعی شادیاں

لاہور،( نمائندہ خصوصی): وزیراعلیٰ پنجاب مریم نواز شریف کے پنجاب دھی رانی پروگرام کے سلسلہ میں کرکٹ اسٹیڈیم راجن پور میں 75 اجتماعی شادیوں کے دوسرے فیز کی پروقار تقریب کا اہتمام کیا گیا۔ تقریب میں صوبائی وزیر سوشل ویلفیئر اینڈ بیت المال پنجاب سہیل شوکت بٹ،ڈپٹی کمشنر راجن پور شفقت اللہ مشتاق، ڈی جی سوشل ویلفیئر پنجاب محمد طارق قریشی، ایم پی اے سردار عبدالعزیز خان دریشک،ڈائریکٹر سوشل ویلفیئر ڈی جی خان مہار مظہر،ڈپٹی ڈائریکٹر سوشل ویلفیئر شازیہ نواز، سماجی شخصیات، ضلعی محکموں کے سربراہان، میڈیا پرسنز اور دولہا و دلہن کے عزیز و اقارب موجود تھے۔ وزیراعلی پنجاب مریم نواز شریف کی طرف سے 75 جوڑوں کو اجتماعی شادی پر ڈبل بیڈ،میٹرس، ڈنر سیٹ، کھانا پکانے کا سامان،پنکھا اور دیگر سامان کے تحائف سمیت دھی رانی پروگرام سلامی کارڈ بھی دیا گیا۔دھی رانی سلامی کارڈ کے ذریعے ہر نوبیاہتا جوڑا ایک لاکھ روپے سلامی حاصل کر سکے گا۔محکمہ سوشل ویلفیئر اینڈ بیت المال کی جانب سے نوبیاہتا جوڑوں اور تقریب کے شرکاء کو ظہرانہ بھی دیا گیا۔ صوبائی وزیر سوشل ویلفیئر اینڈ بیت المال پنجاب سہیل شوکت بٹ،ڈپٹی کمشنر راجن پور شفقت اللہ مشتاق اور ممبر صوبائی اسمبلی پنجاب سردار عبدالعزیز خان دریشک نے اظہار خیال کرتے ہوئے پنجاب دھی رانی پروگرام کے شاندار انعقاد پر محکمہ سوشل ویلفیئر کے افسران وسٹاف اور منتظمین کی کاوشوں کو سراہا۔انہوں نے نوبیاہتا جوڑوں کو زندگی کے نئے سفر کے اغاز پر مبارکباد دی۔ انہوں نے کہا کہ دھی رانی پروگرام پنجاب کی تاریخ کا منفرد پروگرام ہے۔ انہوں نے نوبیاہتا جوڑوں کو مبارکباد دی اور کامیاب اور خوشحال زندگی کے لیے دعا کی۔مولانا قاری محمود قاسمی نے دعا کرائی۔سٹیج سیکرٹری کے فرائض سید مشتاق رضوی نے سر انجام دئیے۔