سابق سینیٹر اور جماعت اسلامی کے رہنما مشتاق احمد خان کے بھائی شکیل احمد خان کی نماز جنازہ صوابی میں ادا

اسلام آباد(نمائندہ خصوصی)سابق سینیٹر اور جماعت اسلامی کے رہنما مشتاق احمد خان کے بھائی شکیل احمد خان کی نماز جنازہ صوابی میں ادا کر دی گئی۔ اس موقع پر امیرجماعت اسلامی پاکستان حافظ نعیم الرحمن، سابق امیر جماعت اسلامی پاکستان سراج الحق، نائب امیر جماعت اسلامی میاں محمد اسلم، ڈائریکٹر امور خارجہ جماعت اسلامی آصف لقمان قاضی، سابق سینئر صوبائی وزیر اورامیر جماعت اسلامی خیبرپختونخوا شمالی عنایت اللہ خان، امیر جماعت اسلامی صوبہ وسطی عبدالواسع، سابق سپیکر قومی اسمبلی اسد قیصر، نائب امرا ئے صوبہ کے پی سید صہیب الدین کاکاخیل، سید بختیار معانی، مولانا محمد اسماعیل، مولانا عبدالاکبرچترالی,میئر مردان حمایت اللہ مایار،سابق صوبائی وزراء حافظ حشمت خان، فضل ربانی ایڈوکیٹ، سماجی و سیاسی شخصیات سمیت ہزاروں نے شرکت کیامیر جماعت کا سابق سینیٹر مشتاق احمد خان کے بھائی کی نماز جنازہ کے بڑے اجتماع سے خطاب کرتے ہوئے کہا کہ شکیل احمد خان کی موت ایک بڑا سانحہ ہے اور ان کی اس طرح شہادت پورے نظام پر سوالیہ نشان ہے۔ انہوں نے مرحوم کے اہل خانہ سے اظہار تعزیت کرتے ہوئے دعا کی کہ اللہ تعالیٰ انہیں شہادت کا درجہ عطا فرمائے اور لواحقین کو صبر اور سکون عطا کرے۔حافظ نعیم الرحمن نے اپنے خطاب میں نشے کی لعنت پر بھی بات کرتے ہوئے کہا کہ ملک میں کئی ایسے واقعات ہو چکے ہیں، لیکن سدباب کے لیے مؤثر اقدامات نہیں کیے جا رہے۔ انہوں نے حکومت سے مطالبہ کیا کہ وہ منشیات کے خلاف سخت کارروائی کرے تاکہ مستقبل میں اس طرح کے سانحات سے بچا جا سکے۔
سابق امیر جماعت اسلامی سراج الحق نے کہا کہ بے گناہ فرد کا اس طرح قتل بہت بڑا ظلم ہے، شکیل احمد خان کی المناک شہادت پر گہرے دکھ کا اظہار کرتے ہیں۔نماز جنازہ کے بعد شکیل احمد خان کو ان کے آبائی علاقے صوابی میں سپرد خاک کر دیا گیا۔ جنازے میں شریک ہزاروں افراد نے غمزدہ خاندان سے اظہار تعزیت کیا اور مرحوم کے ایصال ثواب کے لیے دعا کی۔