سیب کھانے والے نہ صرف ذیابیطس کے مرض سے محفوظ رہ سکتے ہیں بلکہ یہ خوش ذائقہ پھل دیگر امراض سے بھی تحفظ فراہم کرتا ہے۔
’’روزنہ ایک سیب کھائیں، ڈاکٹر سے دور رہیں۔‘‘ یہ محاوہ ایسے ہی نہیں بنا اس کے پیچھے پوشیدہ ہیں اس پھل کے وہ فوائد جو انسان کو مختلف بیماریوں سے تحفظ فراہم کرکے انہیں صحت مند زندگی جینے کے قابل بناتے ہیں۔
سیب ایک جانب ٹائب ٹو ذیابیطس کے مریضوں میں خون میں شوگر کے اضافے کو روکتا ہے تو دوسری جانب ذیابیطس کے خطرے کو پہلے سے کم کرنے میں بھی مدد فراہم کرسکتا ہے۔
اس حوالے سے کئی تجزیات اور مطالعوں میں یہ بات سامنے آئی ہے کہ سیب اور ناشپاتی کے استعمال سے ذیابیطس کے امکانات اٹھارہ فیصد تک کم ہوسکتے ہیں۔
ذیابیطس اور ہائی بلند فشار خون جیسے دل کو نقصان پہنچانے والے امراض سے نمٹنے کے لیے پھلوں میں سیب سب سے مفید پھل تصور کیا جاتا ہے۔
سیب سرخ، سبز، زردی مائل سبز جیسے رنگوں میں دستیاب ہیں اور سب کے ہی الگ الگ خواص ہیں۔
اگر بات کی جائے ذیابیطس کی تو سبز رنگ کے سیب ذیابیطس کے مریضوں کے لیے انتہائی مفید ہیں کیونکہ اس میں چینی کی مقدار بھی کم ہوتی ہے جب کہ اس کے برعکس سرخ سیبوں میں چینی کی مقدار زیادہ ہوتی ہے اس لیے ذیابیطس کے مریض سرخ سیب کھانے سے گریز کریں۔
تو ذیابیطس کے مریض ہرے رنگ کے سیب کھائیں کیونکہ یہ پھل زنک، آئرن اور ٹریس میٹلز سے بھرپور ہے جو بلڈ شوگر کو قابو رکھنے میں مدد فراہم کرتا ہے۔
بلند فشار خون یا ہائی بلڈپریشر آج دنیا بھر کے لیے تشویش کا باعث بن چکا ہے۔
اگر آپ بلندفشار خون کے مرض میں مبتلا ہیں تو سیبوں کو اپنائیں یعنی اپنی خوراک کا حصہ بنائیں کیونکہ سیب اس محرک عنصر کو قابو کرنے میں معاون ثابت ہوسکتا ہے جو دل کی بیماری کے بڑھتے ہوئے خطرے کے لیے ذمے دار ہوتا ہے۔
آنتوں کی صحت کے لیے بھی سیب کی افادیت ثابت ہوچکی ہے۔
سیب پیکٹین کا ایک بھرپور ذریعہ ہیں، یہ ایک ایسا مادہ ہے جو پری بائیوٹک کے طور پر کام کرتا ہے اور آنتوں کی صحت کو بہتر بناتا ہے اس کے علاوہ اس میں غذائی ریشہ ہوتا ہے جو قبض کو روکنے میں مدد فراہم کرتا ہے، اچھے بیکٹریا سپورٹ کرتا ہے اور ہاضمے کے مسائل کو ختم کرتا ہے۔
