اسلام آباد( نمائندہ خصوصی ) پاک بحریہ کے کموڈور عاصم سہیل ملک، کمانڈر کمبائنڈ ٹاسک فورس 150، نے سری لنکن بحریہ کے ڈائریکٹر جنرل آپریشنز ریئر ایڈمرل بدھیکا لیاناگاماگے (Rear Admiral Buddhika Liyanagamage) کے ساتھ آن لائن مشاورت کی۔ اس میٹنگ میں کمبائینڈ میری ٹائم فورسز کے مقاصد کو تقویت دینے اور سمندر میں غیر قانونی بحری سرگرمیوں کا مقابلہ کرنے کے لیے CTF-150 کے مشن کی حمایت میں سری لنکن بحریہ کے ساتھ تعاون کے مزید امکانات پر غوروفکر کیا گیا۔
ملاقات کے دوران کموڈور عاصم سہیل ملک نے سری لنکن نیوی کے ڈی جی آپریشنز کو پاک بحریہ کی 13ویں کمانڈ کے دوارن CTF-150 کی آپریشنل سرگرمیوں سے آگاہ کیا اور نان سٹیٹ ایکٹرز کی طرف سے لاحق خطرات سے نمٹنے کے لیے باہمی تعاون پر مبنی کوششوں کی اہمیت پر زور دیا۔ مزید برآں، CTF-150 میں سری لنکن بحریہ کے اثاثوں کی ممکنہ شرکت پر بھی دونوں فریقوں نے اتفاق کیا کیونکہ شمالی بحیرہ عرب میں منشیات کی اسمگلنگ اور دیگر غیر قانونی سرگرمیوں کو روکنے کے لیے ساحلی ریاستوں کے ساتھ CMF کا تعاون بہت ضروری ہے۔ کمانڈر CTF 150 نے خطے میں بحری امن اور استحکام کے لیے پاکستان بحریہ کے عزم کو بھی اجاگر کیا اور سری لنکا بحریہ ٹیم کو CTF-154 کی آئندہ کمانڈ کے لیے پاکستان بحریہ کے مکمل تعاون اور حمایت کا اعادہ کیا۔ملاقات کے دوران کمبائینڈ میری ٹائم فورسز ہیڈکوارٹرز میں پاکستان اور سری لنکا کے سینئر قومی نمائندوں اور سری لنکن نیوی کے اہم حکام بھی موجود تھے۔ یہ اہم ملاقات پاک بحریہ اور سری لنکن نیوی کے علاقائی میری ٹائم سیکیورٹی کے لیے مضبوط دوطرفہ عزم کی مظہر ہے۔
پاکستان بحریہ کے کمانڈر کمبائینڈ ٹاسک فورس 150 کی سری لنکن بحریہ کے ڈی جی آپریشنز کے ساتھ اہم مشاورت
