بڈاپسٹ (مانیٹرنگ ڈیسک )۔وفاقی وزیر داخلہ محسن نقوی سے سوئٹزرلینڈ -یورپی یونین اور انٹرنیشنل مائیگریشن آرگنائزیشن کے وزراء و سربراہان نے ملاقاتیں کیں جس میں باہمی دلچسپی کے امور، غیر قانونی مائیگریشن اور انسانی سمگلنگ روکنے کے حوالے سے تفصیلی تبادلہ خیال کیا گیا۔ یہ ملاقاتیں دورہ ہنگری کے دوران بڈاپسٹ پراسس کی ساتویں وزارتی کانفرنس کے موقع پر ہوئیں ۔ملاقات کرنے والوں میں سوئٹزرلینڈ کی وزیر مائیگریشن کرسٹین شرنربورنراور یورپی یونین کے مائیگریشن و داخلہ امور کے سربراہ جوہانس لچنر،انٹرنیشنل سینٹر فار مائیگریشن پالیسی ڈویلپمنٹ کے سربراہ مائیکل سپنڈ لیگر شامل تھے۔ وزیر 
داخلہ محسن نقوی نے غیر قانونی مائیگریشن کے سدباب کے لئے مشترکہ اقدامات اٹھانے کی ضرورت پر زوردیتے ہوئے کہا ہے کہ انسانی سمگلنگ کثیر الجہتی چیلنج بن چکا ہے۔انٹرنیشنل مافیاز کے گٹھ جوڑ سے کوئی بھی ملک تنہا نہیں نمٹ سکتا، عالمی چیلنج سے نمٹنے کیلئے عالمگیریت پالیسی اختیار کرنا ہو گی۔ محسن نقوی نے کہا کہ غیر قانونی مائیگریشن اور انسانی سمگلنگ
کے سدباب کے لئے یورپی یونین اور مائیگریشن پالیسی ڈویلپمنٹ کے تعاون کا خیر مقدم کریں گے، آج ہم پائیدار اقدامات کرکے نئی نسلوں کے لیے نسبتاً بہتر مستقبل چھوڑ سکتے ہیں۔اس ضمن میں باہمی وفود کے تبادلوں اور اداروں کی استعداد کار بڑھانے کے لئے اشتراک کار بڑھانا ہو گا۔ متعلقہ اداروں کے افسران کو خصوصی تربیت کیلئے سوئٹزرلینڈ۔یورپی یونین اور انٹرنیشنل مائیگریشن پالیسی ڈویلپمنٹ کے تعاون ضروری ہے۔ تینوں وفود نے وفاقی وزیرداخلہ محسن نقوی کو باہمی اشتراک کار بڑھانے کے لئے تعاون کی یقین دہانی کرائی۔ اس موقع پر ہنگری میں پاکستان کے سفیر آصف حسین میمن اور متعلقہ سفارت کار بھی موجود تھے۔
