سرینگر۔(نیوز ڈیسک)غیرقانونی طورپر بھارت کے زیر قبضہ جموں وکشمیرمیں سیرت النبی ﷺکے سلسلے میں منعقدہ مقابلے کی تقسیم انعامات کی تقریب تاریخی جامع مسجد سرینگر میں منعقدہوئی ۔ کشمیرمیڈیاسروس کے مطابق کل جماعتی حریت کانفرنس کے سینئر رہنماء میرواعظ کشمیر عمر فاروق نے تقریب سے خطاب کرتے ہوئے علم و فن کے حصول اور ایمان و یقین میں زیادتی کیلئے مساجد اور مکاتب کے کردار کو اہم قرار دیا۔انہوں نے کہاکہ مساجد سے صرف عبادتگاہوں کی حیثیت سے ہی کام نہیں لیا جانا چاہیے بلکہ انہیں علم کے حصول اور کردار سازی کے مراکز کے طور پر بھی بروئے کار لانے کی ضرورت ہے۔انہوں نے تقریب 
کے منتظمین کی قابل تحسین کاوشوں کو سراہتے ہوئے اس تقریب کے انعقاد پر انہیں مبارکباد پیش کی ۔ میرواعظ نے اس طرح کی زیادہ سے زیادہ تقاریب کے انعقاد پر زور دیتے ہوئے کہا کہ اس طرح کے مواقع نوجوان نسل کو اسلامی علوم کے حصول اور انہیں سیرت رسول ﷺسے آگاہی اور اپنے عقیدے اور اسلام کی بنیادی تعلیمات کو سمجھنے میں مددگار ثابت ہوں گے۔انہوں نے پیغمبر اسلام ﷺ کی تعلیمات پر عمل پیرا ہونے کی اہمیت پر زوردیتے ہوئے کہا کہ وہ لوگ جو توہین رسالت کا ارتکاب کرکے ہمارے جذبات کو ٹھیس پہنچاتے ہیں انہیں صرف اسی صورت میں بہترین جواب دیا جاسکتا ہے کہ جب ہم مکمل طور پیغمبر اسلام ﷺکی سیرت اور اسوئہ حسنہ پر عمل پیرا ہوکر اپنے عقیدے اور ایمان پر عزم کے ساتھ عمل پیرا رہیں۔
مساجد کو علم کے حصول اور کردار سازی کے مراکز کے طور پر بروئے کار لانے کی ضرورت ہے، میر واعظ عمر فاروق
