سیالکوٹ(نمائندہ خصوصی ) ڈکیتی اندھے قتل کا ڈراپ سین، ٹک ٹاکر بیوی ملوث نکلی تفصیلات کے مطابق 1 ماہ قبل تھانہ اگوکی کے علاقہ میں نامعلوم ملزمان نے دوران ڈکیتی خلیل احمد کو فائرنگ کر کے قتل کردیا تھا جس کا مقدمہ مقتول کے بھائی جلیل احمد کی مدعیت میں درج رجسٹر کیا گیا۔
ڈی پی اوسیالکوٹ سید ذیشان رضا نے دوران ڈکیتی قتل کے اندوہناک واقعہ میں ملوث ملزمان کو ٹریس کرنے کے لیے ایس پی انویسٹی گیشن ناصر محمود باجوہ کی سربراہی میں ڈی ایس پی صدر سرکل اور ایس ایچ او تھانہ اگوکی پر مشتمل خصوصی ٹیم تشکیل دی تھی۔پولیس ٹیم نے دورانِ تفتیش پیشہ وارانہ مہارت کو بروئے کار لاتے ہوئے سائنسی بنیادوں پر تفتیش کو آگے بڑھاتے ہوئے اندھے قتل کا معمہ حل کر لیا ہے. مقتول کی بیوی میمونہ ارم شہزادی جو کہ ٹک ٹاک پر ویڈیوز بناتی ہے نے ٹک ٹاک پارٹنر رضوان عرف زین سے تعلقات استوار کر رکھے تھے جس سے شادی کرنے کے لیے رضوان عرف زین کے ساتھ مل کر شوہر کے قتل کی منصوبہ بندی کی تھی اور شوہر کو قتل کروا کر وقوعہ کو ڈکیتی کا رنگ دے دیا تھا. سیالکوٹ پولیس ذرائع کےمطابق پولیس نے ملزمہ میمونہ ارم شہزادی کو گرفتار کر لیا جبکہ فائرنگ کرنے والے ملزم رضوان اور ایک کس نامعلوم کو گرفتار کرنے کے لیے ٹیمیں تشکیل دے دی گئیں ہیں۔ جن کو جلد ہی گرفتار کر لیا جائے گا۔
