ملتان۔ (اسپورٹس رپورٹر ):پاکستان کرکٹ ٹیم نے انگلینڈ کے خلاف پہلے ٹیسٹ میچ کے لئے پلئینگ الیون کا اعلان کردیا،قومی کرکٹ ٹیم تین فاسٹ باؤلرز اور ایک ریگولر اسپنر کے ساتھ میدان میں اترے گی۔پاکستان ٹیم میجمنٹ کی جانب سے اعلان کردہ گیارہ رکنی سکواڈ کے مطابق انگلینڈ کے خلاف تین ٹیسٹ میچوں کی سیریز کے پہلے میچ میں شان مسعود کپتان،سعود شکیل نائب کپتان ،صائم ایوب،عبداللہ شفیق، بابر اعظم،محمد رضوان،سلمان علی آغا،عامر جمال،شاہین شاہ آفریدی،نسیم شاہ اور ابرار احمد پلئینگ الیون میں شامل ہیں۔علاوہ ازیں ملتان کرکٹ اسٹیڈیم میں اتوار کے روز پریس کانفرنس کرتے ہوئے قومی ٹیسٹ کرکٹ ٹیم کے کپتان شان مسعود نے کہا کہ ہمیں فوکس کرنا ہے کہ انگلینڈ کی ٹیم کو کس طرح قابو کرسکتے ہیں،انگلینڈ کی ٹیم کا اسٹائل معلوم ہے انہوں نے کس طرح کرکٹ کھیلنی ہے، انگلینڈ کیخلاف آخری سیریز میں جیت کے بہت قریب تھے۔انجری کے 
باعث انگلش کپتان بین اسٹوکس کا پہلے ٹیسٹ میں ٹیم سے باہر ہونے سے متعلق پوچھے گئے سوال کے جواب میں شان مسعود نے کہا کہ بین اسٹوکس کا شمار دنیا کے ٹاپ آل راؤنڈر میں ہوتا ہے،انگلینڈ ٹیم بین اسٹوکس کے بغیر بھی کھیلی ہے،انگلینڈ کی اسٹرینتھ ایک کھلاڑی سے کم نہیں ہوگی،انگلینڈ کو اسٹوکس کا نقصان ضرور ہو گا لیکن ان کی پلیئنگ الیون اچھی ہے۔شان مسعود نے کہا کہ ہمیں اپنی مضبوط کرکٹ کھیلنا ہے،ہم ماضی میں قریب آ کر ہارتے رہے ہیں،ہماری یہ بیسٹ پلیئنگ الیون ہے،عامر جمال کے آنے کا ٹیم کوفائدہ ہو گا،تسلسل لانے کے لئے بیٹنگ لائن کو برقرار رکھا ہے۔قومی ٹیسٹ کرکٹ ٹیم کے کپتان نے کہا کہ ٹیسٹ میچ پانچ دن کا کھیل ہے،اس لیے آپ حکمت عملی ایک نہیں رکھ سکتے،عامر جمال نے آسٹریلیا میں اچھا پرفارم کیا ہے اس لیے آٹھ نمبرتک بیٹنگ کی،انگلینڈ کے پاس اچھے سیمرز ہیں،ہم غلط اندازہ نہیں لگا سکتے۔انہوں نے کہا کہ سلیکشن میں مستقل مزاجی دکھانا ہوتی ہے، فاسٹ بولرز کی انجری کے سبب روٹیشن کرنا پڑتی ہے،بیٹرز کی صورتحال تھوڑی مختلف ہوتی ہے۔واضح رہے کہ پاکستان اور انگلینڈ کے مابین پہلا ٹیسٹ آج پیر کو ملتان میں شروع ہوگا۔ایک روز قبل انگلینڈ نے پاکستان کے خلاف پہلے ٹیسٹ کے لیے پلیئنگ الیون کا اعلان کر دیا تھا۔بین سٹوکس انجری سے نجات نہیں پا سکے جس کی وجہ سے انگلش ٹیم کی قیادت اولی پوپ کریں گے۔
پاکستان کا انگلینڈ کے خلاف پہلے ٹیسٹ میچ کیلئے پلیئنگ الیون کا اعلان
