اسلام آباد(نمائندہ خصوصی )وزیراعظم محمد شہباز شریف کی دعوت پر ملائیشیا کے وزیر اعظم اپنے 3 روزہ سرکاری دورے پر پاکستان پہنچ گئے۔وزیر اعظم محمد شہباز شریف نے ملائیشیا کے وزیر اعظم داتو سری انور ابراہیم کا نور خان ایئر بیس پہنچنے پر پرتپاک استقبال کیا۔بدھ کو وزیراعظم آفس کے میڈیا ونگ سے جاری کردہ بیان کے مطابق اسلام آباد پہنچنے پر پاک فوج کے چاق و چوبند دستے نے ملائیشیا کے وزیر اعظم کو سلامی دی۔ملائیشیا کے وزیر اعظم کو 21 توپوں کی سلامی دی گئی۔ روایتی لباس
میں ملبوس بچوں نے ملائیشیا کے وزیر اعظم کو پھول پیش کئے۔نائب وزیر اعظم و وزیر خارجہ محمد اسحاق ڈار، وزیر کامرس جام کمال خان اور وزیر اطلاعات و نشریات عطاء اللہ تارڑ بھی وزیر اعظم کے ہمراہ استقبال میں شریک تھے۔ملائیشیا کے وزیراعظم داتو سری انور ابراہیم دورے کے دوران وزیراعظم محمد شہبازشریف سے ملاقات کریں گے۔وزیر اعظم ملائیشیا داتو 
سری انور ابراہیم صدر مملکت آصف علی زرداری سے بھی ملاقات کریں گے۔دورے کے دوران پاکستان ملائیشیا دو طرفہ تعاون کے فروغ پر گفتگو اور دونوں ممالک کے مابین شراکت کے حوالے سے اہم پیش رفت ہوگی۔ملائیشیا کے وزیر اعظم کے ہمراہ اعلی سطح کا کاروباری شخصیات و سرمایہ کاروں کا وفد بھی پاکستان آیا ہے۔وفد پاکستانی کاروباری شخصیات و سرمایہ کاروں سے ملاقات کرے گا جس سے دونوں ممالک کے مابین تجارت و سرمایہ کاری کو فروغ ملے گا۔دونوں ممالک کے مابین تجارت و سرمایہ کاری میں تعاون کیلئے ملائیشیا کے وزیراعظم پاکستان-ملائیشیا بزنس فورم میں شرکت بھی کریں گے۔
