چیئرمین وزیراعظم یوتھ پروگرام رانا مشہود احمد سے پاکستان میں ایتھوپیا کے سفیر جمال بکر عبداللہ کی ملاقات، نوجوانوں کو بااختیار بنانے پر اتفاق

اسلام آباد۔(نمائندہ خصوصی ):چیئرمین وزیراعظم یوتھ پروگرام رانا مشہود احمد خان سے پاکستان میں ایتھوپیا کے سفیر جمال بکر عبداللہ نے ملاقات کی جس میں دونوں ممالک میں نوجوانوں کو بااختیار بنانے کیلئے نئی راہیں تلاش کرنے اورباہمی دلچسپی کے امور پر تبادلہ خیال کیا گیا۔ وزیراعظم یوتھ پروگرام سے بدھ کو جاری بیان کے مطابق سفیر نے ایتھوپیا اور پاکستان دونوں میں نوجوانوں کی نمایاں آبادی کو اجاگر کیا اور تعاون کے امکانات پر زور دیا۔انہوں نے توانائی اور اختراعات کو بروئے کار لانے کی اہمیت پر زور دیتے ہوئے کہا کہ ایتھوپیا کے نوجوان موسمیاتی تبدیلی کے خلاف جنگ میں ایک اہم کردار ادا کر رہے ہیں۔ رانا مشہود احمد خان نے موجودہ حکومت کے تحت ایتھوپیا کی متاثر کن ترقی کی تعریف کرتے ہوئے کہاکہ ہم اپنے نوجوانوں کو بااختیار بنانے کے لیے تعاون کر سکتے ہیں، وزیر اعظم شہباز شریف نے نوجوانوں کی ترقی کے لیے متعدد اقدامات کیے ہیں جس سے دونوں ممالک کو فائدہ ہوگا۔ایتھوپیا کےسفیر نے مزید کہا کہ پاکستانی تاجروں کو ایتھوپیا میں جنوری 2025 میں ہونے والی سنگل کنٹری نمائش میں شرکت کے لیے مدعو کیا گیا ہے، جو تجارتی تعلقات کو مضبوط کرنے کا ایک منفرد موقع فراہم کرے گی۔ملاقات میں پاکستان اور ایتھوپیا میں نوجوانوں کے مستقبل کے لیے مزید اقدامات کرنے کامشترکہ عزم ظاہر کیا گیا ۔