اسلام آباد۔(شوبز رپورٹر ):قوالی کے فن میں منفرد مقام رکھنے والے مقبول احمد صابری کی برسی ہفتہ کو منائی گئی ۔دنیا بھر میں قوالی اور دیگر صوفیانہ کلام کی گائیکی کے ذریعے شہرت کمانے والے صابری برادران کسی تعارف کے محتاج نہیں ہیں،مقبول احمد صابری 1945کو بھارت کے علاقے کلیانہ میں پیدا ہوئے۔انہوں نے ابتدائی تعلیم اپنے والد عنایت حسین صابری سے حاصل کی 
اور پھر اپنے بڑے بھائی غلام فرید صابری کے ساتھ قوالی کی شروعات کی اور صابری برداران کے نام سے شہرت حاصل کی۔مقبول صابری نے 11 سال کی عمر میں ہی قوالی کا آغاز کر دیا اور ان کا فن آج بھی زندہے۔’’تاجدار حرم ‘‘ اور ’’بھردو جھولی میری یا محمدؐ‘‘ کا شمار ان کی مشہور قوالیوں میں ہوتا ہے،1970 اور 1980کی دہائیوں میں صابری برادران کو بہت پذیرائی ملی اورانہوں نے پاکستان کے ساتھ دنیا کے مختلف ممالک میں بھی اپنی آواز کا جادو جگایا۔صابری برادران کو موسیقی اور بالخصوص قوالی کے شعبہ میں نمایاں خدمات کے اعتراف میں حکومت پاکستان کی جانب سے صدارتی تمغہ حسن کارکردگی سمیت کئی عالمی اعزازات سے بھی نوازا گیا۔21 ستمبر 2011 کو مقبول احمد صابری دنیا فانی سے کوچ کر گئے۔ ان کی برسی کے موقع پر مختلف تنظیموں اور شو بز انڈسٹری کے زیر اہتمام مختلف تقریبات میں ان کی خدمات کو اجاگر کیا گیا۔
