پاکستان سمیت دنیا بھر میں امن کا عالمی دن ہفتہ کو منایا گیا

اسلام آباد(نمائندہ خصوصی )۔پاکستان سمیت دنیا بھر میں امن کا عالمی دن ہفتہ (21 ستمبر )کو منایا گیا ۔ اس دن کو منانے کا مقصددنیا بھر میں عام آدمی کو امن کی اہمیت اور جنگوں کی بربادی اور نقصانات کے بارے میں آگاہی فراہم کرنا ، برداشت، ہم آہنگی، انسانیت کا احترام جیسی روایات کو پروان چڑھانے اور نوجوان نسل میں اس حوالے سے شعوراجاگر کرنا ہے۔یہ دن عدم تشدد اور جنگ بندی کے طور پر بھی منایا گیا۔امن کے بین الاقوامی دن کے موقع پرپاکستان سمیت دنیا بھر میں مختلف سرگرمیوں اور امن کے فروغ کی کوششوں کو اجاگر کرنے کے لئے تقریبات کا انعقاد کیا گیا ۔سرکاری اور نجی سطح پر منعقدہ تقریبات میں دنیا کو امن کا گہوارہ بنانے کے حوالے سے کئے گئے مختلف اقداما ت اور کاوشوں کو اجاگر کیا گیا ۔جن میں بین المذاہب ہم آہنگی کا فروغ ،امن اور بھائی چارے کی فضاکا قیام اور معاشروں کو ایک دوسرے کےقریب لانے کے لئے اقدامات شامل ہیں۔ واضح رہے کہ اقوام متحدہ نے 2001 میں 21 ستمبر کوعالمی یوم امن کے طور پر منانے کا فیصلہ کیا تھا اورجس کی روشنی میں پہلا عالمی یوم امن 21 ستمبر 2002 کو منایا گیا اور ہر سال پاکستان سمیت دنیا بھر میں 21 ستمبر کو امن کا عالمی دن منایا جاتا ہے ۔