پاک فضائیہ قربانیوں، بہادری اور پیشہ ورانہ مہارت کی قابل فخر تاریخ رکھتی ہے،ائیر چیف مارشل ظہیر احمد بابر سدھو

راولپنڈی۔(نمائندہ خصوصی ):ائیر چیف مارشل ظہیر احمد بابر سدھو نے کہاہے کہ پاک فضائیہ قربانیوں، بہادری اور پیشہ ورانہ مہارت کی قابل فخر تاریخ رکھتی ہے،یوم شہداء غیر معمولی بہادری، بے مثال پیشہ ورانہ مہارت اور افواج پاکستان کی قربانیوں کے بے مثال جذبے کا مظہرہے ۔ پاک فوج کے شعبہ تعلقات عامہ کے جاری بیان کے مطابق پاک فضائیہ نے 7 ستمبر کو ملک بھر میں تمام پی اے ایف بیسز پر یوم شہدا کے طور پر منایا۔اس دن کا آغاز 1965 اور 1971 کی جنگوں کے شہداء اور قیام پاکستان کے بعد سے فرائض کی انجام دہی کے دوران قربانیاں دینے والوں کے لیے قرآن خوانی سے ہوا۔ائیر چیف مارشل ظہیر احمد بابر سدھو ایئر ہیڈ کوارٹرز اسلام آباد میں یوم شہدا کی تقریب کے مہمان خصوصی تھے۔ اس موقع پر خطاب کرتے ہوئے ائیر چیف نے کہا کہ پاک فضائیہ قربانیوں، بہادری اور پیشہ ورانہ مہارت کی قابل فخر تاریخ رکھتی ہے۔انہوں نے کہا کہ یوم شہداء غیر معمولی بہادری، بے مثال پیشہ ورانہ مہارت اور افواج پاکستان کی قربانیوں کے بے مثال جذبے کا مظہر ہے۔پاک فضائیہ کے شہدا کی شاندار بہادری کو سراہتے ہوئے ائیر چیف نے کہا کہ ہم اپنے ہیروز کے شکر گزار ہیں کہ انہوں نے ہمارے لیے جو کچھ کیا اور آنے والی نسلوں کے لیے قربانی کی اعلیٰ مثال قائم کی۔ اس پروقار موقع پر ہم ان ہیروز کو دل کی گہرائیوں سے خراج عقیدت پیش کرتے ہیں جنہوں نے مادر وطن کے لئے عظیم قربانی دی۔اپنے اختتامی کلمات میں انہوں نے مسلسل بدلتے ہوئے عالمی منظرنامے میں پاکستان کی ترقی اور ترقی کے لئے ہر ممکن کوششیں کرنے کے عزم کا اعادہ کیا اور اس عزم کا اعادہ کیا کہ پاک فضائیہ پاکستان کی خودمختاری اور علاقائی سالمیت کو یقینی بنانے کے لئے خلائی، الیکٹرانک وار فیئر، سائبر، مخصوص ٹیکنالوجیز اور دیسی دفاعی صلاحیتوں میں ترقی کے لئے سخت جدوجہد جاری رکھے گی۔بعد ازاں شہدا کو خراج عقیدت پیش کرنے کے لیے ایئر چیف نے یادگار شہدا پر پھولوں کی چادر چڑھائی اور فاتحہ خوانی کی۔