سری نگر :(مانیٹرنگ ڈیسک )کل جماعتی حریت کانفرنس نے 1965 کی پاک بھارت جنگ کے ان شہداءکو شاندار خراج عقیدت پیش کیا ہ جنہوں نے مملکت خداد پاکستان کے دفاع کیلئے اپنی جانوں کا نذرانہ پیش کیا اور دشمن کے ناپاک عزائم خاک میں ملا دیے۔
کشمیرمیڈیاسروس کے مطابق کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں کہا کہ 6 ستمبر ”یوم دفاع پاکستان “ ہمت ، شجاعت اور بہادری کی ایک لازوال داستان ہے۔ انہوںنے کہا کہ بھارت نے 6ستمبر 1965کو رات کی تاریخی میں پاکستان پر بزدلانہ حملہ کیا لیکن پاکستان کی بہادر افواج اور غیور عوام کے سامنے اسے منہ کی کھانی پڑی۔انہوںنے کہا کہ ایک مضبوط ، مستحکم اور خوشحال پاکستان نہ صرف خطے میں امن وسلامتی بلکہ کشمیری عوام کی تحریک آزادی کا بھی ضامن بھی ہے۔ترجمان نے کہا کہ مسئلہ کشمیر خطے میں امن کی راہ میں سب سے بڑی 
رکاوٹ ہے۔ انہوں نے کہا کہ جب تک مسئلہ کشمیر اقوام متحدہ کی قراردادوں اور کشمیریوں کی خواہشات اور امنگوں کے مطابق حل نہیں ہوتا جنوبی ایشیا میں دیر پا امن و سلامتی کا خواب شرمندہ تعبیر نہیں ہو سکتا۔حریت رہنماﺅں اور تنظیموں غلام محمد خان سوپوری، غلام نبی وار،سید بشیر اندرابی، فریدہ بہن جی ، یاسمین راجہ ، زمرودہ حبیب، فیاض حسین جعفری ، خواجہ فردوس ، سبط شبیر قمی ،محمد عاقب، عبدالصمد انقلابی، مولانا مصعب ندوی، محمد شفیع لون ، شیخ معراج ،جموں کشمیر مسلم لیگ، جموں کشمیر ڈیموکریٹک فریڈم پارٹی، پیپلزفریڈم لیگ اور تحریک حریت جموں کشمیر نے اپنے بیانات میں کہا کہ بھارتی توسیع پسندانہ عزائم عالمی امن اور جنوبی ایشیا کے امن کے لیے حقیقی خطرہ ہیں۔ بھارتی حکمرانوں کے تکبر اور گھمنڈ نے خطے کے امن کو خطرے میں ڈال دیا ہے ۔ان کا کہنا تھا کہ بھارت اور پاکستان کے درمیان دشمنی کی بنیادی وجہ تنازعہ کشمیر ہے۔ پاکستان نے حق خودارادیت کے حصول کیلئے کشمیریو ں کی منصفانہ جدوجہد کی ہمیشہ حمایت کی ہے۔ پاکستان کشمیریوں کے حق خود اردیت کا ایک بڑا وکیل ہے جو ہر عالمی اور علاقائی فورم پر کشمیر کاز کی وکالت کررہا ہے۔دریں اثنا ءکل جماعتی حریت کانفرنس آزاد جموں وکشمیر شاخ کے کنوینر غلام محمد صفی، جنرل سیکرٹری پرویز احمد شاہ،محمدفاروق رحمانی ،سیکرٹری اطلاعات مشتاق احمد بٹ، محمد سلطان بٹ، زاہد اشرف، گلشن احمد ، الطاف احمد بٹ اور امتیاز وانی نے کہا کہ پاکستان کشمیریوں کی واحد امید ہے ، کشمیری اپنی بھر پور اخلاقی، سیاسی اور سفارتی حمایت پر پاکستان کے مشکورہیں۔انہوں نے کہا کہ بھارت نے کشمیریوں کے خلاف جنگ کا اعلان کررکھا ہے اور اس نے کشمیریوں کی آزادی کی آواز کو دبانے کے لیے 10 لاکھ سے زائدفورسز اہلکار مقبوضہ علاقے میں تعینات کررکھے ہیں۔انہوںنے کہا کہ تنازعہ کشمیر کا بہترین حل اقوام متحدہ کی قراردادوں پر من و عن عمل درآمد میں ہی مضمر ہے۔
کل جماعتی حریت کانفرنس کا 1965 کی جنگ کے شہدا ءکو خراج عقیدت
