کابل( نیٹ نیوز) افغانستان میں چھپائی گئی طالبان کے بانی ملا عمر کے زیرِ استعمال رہنے والی گاڑی کو طالبان حکومت منظرِ عام پر لے آئی۔سماجی رابطے کی ویب سائٹ ٹوئٹر پر طالبان حکومت سے وابستہ ایک عہدیدار محمد جلال نے اپنی ٹوئٹ میں زمین کھود کر ایک گاڑی کو نکالنے کی تصاویر شیئر کی ہیں۔جس میں دیکھا جاسکتا ہے کہ گاڑی کو محفوظ رکھنے کیلئے اسے پلاسٹک شیٹ سے بھی ڈھکا گیا تھا۔
ٹوئٹ میں دعویٰ کیا گیا ہے کہ یہ گاڑی طالبان کے بانی ملا عمر کے زیرِ استعمال رہی ہے۔محمد جلال نے اپنی ٹوئٹ میں مزید لکھا کہ مرحوم امیر ملا عمر امریکی حملے کی شروعات کے دوران قندہار سے زابل کے سفر کیلئے یہی ویگو گاڑی استعمال کیا کرتے تھے۔تاہم ٹوئٹ میں یہ واضح نہیں کہ یہ گاڑی کب اور کس علاقے میں دفن کی گئی۔قبل ازیں طالبان نے وہ گھر بھی دکھایا تھا جہاں ملا عمر نے اپنی آخری ایام گزارے تھے۔ وہ جولائی 2015 میں علالت کے باعث انتقال کر گئے تھے۔
