کراچی۔ (نمائندہ خصوصی ):اولمپئین ارشد ندیم کی وزیراعلیٰ ہاؤس آمد پر وزیراعلی سندھ سید مراد علی شاہ نے استقبال کیا۔ترجمان وزیراعلی سندھ کے مطابق صوبائی وزیر ناصر شاہ ارشد ندیم کو گھر سے لے آئے،وزیراعلیٰ سندھ نے صوبائی کابینہ کے اجلاس میں بریک کر کے ارشد ندیم سے ملے۔ترجمان نے مزید بتایا کہ وزیراعلیٰ سندھ سید مراد علی شاہ نے اولمپئین ارشد ندیم کو وزیراعلیٰ ہاؤس آنے کی دعوت دی تھی۔ارشد ندیم نے بتایا کہ وزیراعلیٰ سندھ نے پیرس میں گولڈ میڈل ملنے سے پہلے کال کر 
کے مبارک باد دی تھی،انہوں نے وزیراعلی سندھ سے کہا کہ مجھے آپ سے مل کر بہت خوشی ہوئی ہے۔وزیراعلی سندھ نے گفتگو کرتے ہوٸے بتایا کہ چیئرمین بلاول بھٹو زرداری نے آپ کیلئے پیغام دیا ہے کہ آپ ارشد ندیم کو اگلے اولمپکس کے لئے ابھی سے تیاری کرنی ہے، ہماری 24 کروڑ آبادی ہے، 24 گولڈ میڈل ملک میں ہونے چاہئیں۔وزیراعلیٰ سندھ سید مراد علی شاہ نے ارشد ندیم کے کوچ کے لیے بھی 5 ملین روپے دینے کا اعلان کیا۔انہوں نے کہا کہ سندھ حکومت ارشد ندیم کی بھرپور سپورٹ کرتی رہے گی،آپ صرف ایک فون کال کریں میں آپ سے بات کرونگا۔ترجمان نے مزید بتایا کہ انڈس موٹرز کے سی ای او علی اصغر جمالی نے ارشد ندیم کو گاڑی دینے کا اعلان کیا۔سینئر صوبائی وزیر شرجیل انعام میمن نے ارشد ندیم کو کہا کہ آپ کو گاڑی کی رجسٹریشن کیلئے جو نمبر چاہئے وہ دینگے۔وزیراعلی سندھ نے کہا کہ صوبائی وزیر ناصر حسین شاہ آپ ارشد ندیم سے رابطے میں رہیں گے۔صوبائی وزیر ناصر شاہ نے ارشد ندیم کی والدہ کیلئے گاڑی دینے کا اعلان کیا۔صوبائی وزیر کھیل محمد بخش مہر نے بھی ارشد ندیم کو خوش آمدید کیا۔انہوں نے کہا کہ میں ذاتی حیثیت میں بھی ارشد ندیم کیلئے انعامات کا اعلان کرچکا ہوں۔میئر کراچی مرتضیٰ وہاب نے بھی ارشد ندیم کے نام پر اکیڈمی قائم کرنے کا اعلان کیا۔
