صدر مملکت آصف علی زرداری کا جنوبی وزیرستان میں چار جوانوں کی خوارج کے ساتھ فائرنگ میں شہادت پر اظہار افسوس

اسلام آباد۔(نمائندہ خصوصی ):صدر مملکت آصف علی زرداری نے جنوبی وزیرستان میں چار جوانوں کی خوارج کے ساتھ فائرنگ میں شہادت پر اظہار تعزیت کرتے ہوئے کہا ہے کہ قوم اپنے بہادر جوانوں کے ساتھ کھڑی ہے۔ بدھ کو ایوان صدر پریس ونگ کی جانب سے جاری تعزیتی بیان میں صدر مملکت نے کہا کہ جوانوں نے اپنی جانوں پر کھیل کر چھ خوارج کو جہنم رسید کیا، قوم وطن کیلئے جان کا نذرانہ پیش کرنے والے اپنے بہادر جوانوں کو سلام پیش کرتی ہے۔انہوں نے کہا کہ ملک کو دہشت گردی کی لعنت سے پاک کرنے کے لئے ہر قربانی کے لیے تیار ہیں، قوم اپنے بہادر جوانوں کے ساتھ کھڑی ہے۔ صدر مملکت نے فائرنگ کے تبادلے میں پاک فوج کے 4 جوانوں کی شہادت پر اظہار افسوس کیا اور شہداء کیلئے بلندی درجات اور اہل خانہ کیلئے صبر جمیل کی دعا کی۔