اسلام آباد۔(نمائندہ خصوصی ):وزیراعظم محمد شہباز شریف نے ہیپاٹائٹس سی کے خاتمے کی ملک گیر مہم شروع کرنے کا اعلان کرتے ہوئے کہا ہے کہ ہیپاٹائٹس کی روک تھام، تشخیص اور علاج کے لیے فوری طور پر کام کرنے کی ضرورت ہے، حکومت ہیپاٹائٹس کی وجہ سے درپیش چیلنجوں پر قابو پانے کے لیے پر عزم ہے، ہیپاٹائٹس سی کے خاتمے کے پروگرام کے تحت پاکستان کے ہر شہری کو ہیپاٹائٹس سی کے لیے اسکریننگ اور علاج کی سہولیات تک مفت رسائی حاصل ہوگی، ہمیں اس بیماری کو ختم کرنے اور سب کے لیے صحت مند مستقبل کو یقینی بنانے کے لئے مل کر کام کرنے کی ضرورت ہے۔اتوار کو وزیراعظم آفس کے میڈیا ونگ سے جاری پریس ریلیز کے مطابق ہیپاٹائٹس سے آگاہی کے عالمی دن کے موقع پر اپنے پیغام میں وزیراعظم شہباز شریف نے کہا کہ اس سال ہیپاٹائٹس کے عالمی دن کا موضوع’’ یہ عمل کا وقت ہے‘‘ہمیں یاد دلاتا ہے کہ ہمیں ہیپاٹائٹس کی روک تھام، تشخیص اور علاج کے لیے فوری طور پر کام کرنے کی ضرورت ہے۔ آج کا دن ہمیں یاد دلاتا ہے کہ ہم ہیپاٹائٹس کے خاتمے کے حوالے سے اقدامات میں تاخیر کے متحمل نہیں ہو سکتے،ہمیں اس بیماری کو ختم کرنے اور سب کے لیے صحت مند مستقبل کو یقینی بنانے کے لئے مل کر کام کرنے کی ضرورت ہے۔وزیراعظم نے کہا کہ ہیپاٹائٹس ایک خاموش وبا ہے جو دنیا بھر میں لاکھوں لوگوں کو متاثر کرتی ہے، جس سے جگر میں سوزش پیدا ہوتی ہے اور اگر بر وقت علاج نہ کیا جائے تو ممکنہ طور پر شدید پیچیدگیاں پیدا ہو سکتی ہیں، پاکستان میں ایک بہت بڑی آبادی ہیپاٹائٹس سی انفیکشن سے متاثر ہے، عالمی سطح پر 60 ملین ہیپاٹائٹس سی 
کیسز میں سے 10 ملین متاثرہ کیسز پاکستان میں ہیں۔ خدشہ ہے کہ اگر وائرل ہیپاٹائٹس کی روک تھام اور خاتمے کے لیے ضروری اقدامات نہ کیے گئے تو ہم جگر کے کینسر کی وبا بھی دیکھ سکتے ہیں۔وزیر اعظم نے کہا کہ بحیثیت قوم، ہم نے آگاہی مہم ، ویکسی نیشن پروگراموں،جانچ اور علاج تک بہتر رسائی کے ذریعے وائرل ہیپاٹائٹس سے نمٹنے میں اہم پیش رفت کی ہے، تاہم ابھی بہت کام کرنا باقی ہے، ہمیں ہیپاٹائٹس کی روک تھام کو ترجیح دینی ہے، جلد تشخیص کو یقینی بنانا اور سب کے لیے سستی اور قابل رسائی علاج فراہم کرنا ہیں۔وزیراعظم نے کہا کہ بطور وزیر اعلیٰ پنجاب میرے دور میں پاکستان کڈنی اینڈ لیور ٹرانسپلانٹ انسٹی ٹیوٹ کا قیام عمل میں لایا جو کہ ایک سنگ میل ہے۔ پنجاب کے تمام 36 اضلاع میں ہیپاٹائٹس کے حوالے سے جدید فلٹر کلینکس کے ساتھ گردے اور جگر کے مریضوں کو جدید ترین طبی سہولیات فراہم کی گئیں۔وزیر اعظم نے کہا کہ حکومت ہیپاٹائٹس کی وجہ سے درپیش چیلنجوں پر قابو پانے کے لیے پر عزم ہے، اس حوالے سے مجھے ایک ملک گیر مہم، جس کا مقصد ہیپاٹائٹس سی کو ختم کرنا ہے، کا اعلان کرتے ہوئے خوشی ہو رہی ہے۔ ہماری توجہ جانچ اور علاج کے مراکز کی بہتری پر مرکوز ہو گی، اس بات کو یقینی بنایا جائے گا کہ فراہم کی جانے والی خدمات ہمارے شہریوں کی ضروریات کے مطابق ہوں۔وزیر اعظم نے کہا کہ میں یقین دلاتا ہوں کہ پاکستان کے ہر شہری کو ہیپاٹائٹس سی کے لیے سکریننگ اور علاج کی سہولیات تک مفت رسائی حاصل ہوگی۔اس اقدام کا بنیادی مقصد ایچ سی وی سے متاثرہ افراد کی صحت اور بہبود کو بہتر بنانا ہےجبکہ اس کے ساتھ ساتھ اس کے نقصانات کو کم کرنا ، جگر کے کینسر اور اس بیماری سے قبل از وقت موت کے خدشات کو کم کرنا ہے۔ وزیراعظم نے کہا کہ آئیے ہیپاٹائٹس کے اس عالمی دن پر، ہم ہیپاٹائٹس کے حوالے سے آگہی، وائرل ہیپاٹائٹس سے متاثرہ افراد کی مدد کرنے اور اس بیماری کے بوجھ سے آزاد مستقبل کے لیے کام کرنے کی اپنی کوششوں میں متحد ہو جائیں، ہم سب مل کر ایک صحت مند اور زیادہ خوشحال قوم بن سکتے ہیں۔
پاکستان کے ہر شہری کو ہیپاٹائٹس سی کے لیے سکریننگ اور علاج کی سہولیات تک مفت رسائی حاصل ہوگی، وزیراعظم محمد شہباز شریف
–
پچھلی پوسٹ
126 ممالک کے تاجروں، سرمایہ کاروں اور سیاحوں کو بغیر فیس کے 24 گھنٹے کے اندر آن لائن نظام کے تحت ویزے جاری کئے جائیں گے۔شہباز شریف
اگلی پوسٹکرم ( نمائندہ خصوصی ) کرم کے دو قبائل کے درمیان اراضی تنازع پر فائرنگ کا سلسلہ پانچویں روز بھی جاری ہے ، جاں بحق افراد کی تعداد 20 تک پہنچ گئی۔ ذرائع کے مطابق پارا چنار اور صدہ شہر پر متعدد میزائل فائر کیے گئے ہیں ، کئی دیہات میں جاری جھڑپوں میں اب تک 112 افراد زخمی ہو چکے ہیں۔کشیدہ صورتحال کے باعث پارا چنار سے پشاور مین روڈ بھی ہر قسم کی آمدورفت کے لیے بند ہے ،متاثرہ علاقوں میں پولیس اور سیکیورٹی فورسز کی بھاری نفری موجود ہے۔
