اسلام آباد۔(نمائندہ خصوصی )وزیرِ اعظم محمد شہباز شریف نے پاکستان کے پہلے نشانِ حیدر پانے والے کیپٹن محمد سرور شہید کو خراج عقیدت پیش کرتے ہوئے کہا ہے کہ ان کا یومِ شہادت پوری قوم کو اپنے شہداء کی بے مثال قربانیوں کی یاد دلاتا ہے،پاکستانی قوم ملکی دفاع کیلئے افواجِ پاکستان کی قربانیاں کبھی فراموش نہیں کر سکتی۔ہفتہ کو وزیر اعظم آفس کے میدیا ونگ سے جاری پریس ریلیز کے مطابق کیپٹن سرور شہید کے 76ویں یومِ شہادت پر اپنے پیغام میں انہوں نے کہا کہ کیپٹن محمد سرور شہید نے 1948 کی جنگ میں جرات و بہادری کی مثال قائم کرتے ہوئے جامِ شہادت نوش کیا،کیپٹن محمد سرور شہید نے
مٹی کی حفاظت کو اپنی جان پر فوقیت دے کر آئندہ نسلوں کیلئے مادر وطن سے وفا کی لازوال مثال قائم کی۔ وزیرِ اعظم نے کہا کہ کیپٹن محمد سرور شہید نشانِ حیدر کا یومِ شہادت پوری قوم کو اپنے شہداء کی بے مثال قربانیوں کی یاد دلاتا ہے،پاکستانی قوم ملکی دفاع کیلئے افواجِ پاکستان کی قربانیاں کبھی فراموش نہیں کر سکتی وزیرِ اعظم نے کہا کہ افواجِ
پاکستان کے افسران و جوان ملک کے دفاع کیلئے عظیم قربانیاں دیتے آئے ہیں اور دے رہے ہیں،مجھ سمیت پوری قوم کو پاک فوج کے شہداء اور انکے اہلِ خانہ پر فخر ہے۔وزیرِ اعظم نے کہا کہ پوری قوم ملکی دفاع کی خاطر اپنی جانوں کی پرواہ کئے بغیر اپنے فرائض کی انجام دہی کرتے افواج پاکستان کے افسران و جوانوں کے شانہ بشانہ کھڑی ہے۔
