اسلام آباد۔(نمائندہ خصوصی )وفاقی وزیر برائے قانون، انصاف اور انسانی حقوق، سینیٹر اعظم نذیر تارڑ نے انسانی حقوق کی خلاف ورزیوں کو مؤثر طریقے سے رپورٹ اور حل کرنے کے لیے جدید جدید موبائل ایپلیکیشن ’’آواز ایپ ‘‘کا افتتاح کردیا۔وزارت انسانی حقوق کے مطابق یہ اقدام انفرادی تحفظ اور فلاح و بہبود کی کوششوں میں ایک اہم پیش رفت کی نمائندگی کرتا ہے۔آواز ایپ وزارت انسانی حقوق کا ایک اہم اقدام ہے، جو کہ اہم انسانی حقوق کے مسائل پر فوری ردعمل کو یقینی بناتا ہے۔ ایپ صارفین کو انسانی حقوق کی خلاف ورزیوں کو رپورٹ کرنے میں مدد فراہم کرتی ہے، جس میں گمشدہ یا اغوا شدہ بچوں کے کیسز شامل ہیں۔ یہ رپورٹس فوری طور پر متعلقہ حکام کو مناسب کاروائی کرنے کے لئے بھیجی جاتی ہیں۔رپورٹ موصول ہونے پر، ایپ ایک الرٹ سسٹم کو فعال کرتی ہے جو قانون نافذ کرنے والے اداروں، حکومتی محکموں، اور کمیونٹی تنظیموں کے درمیان
مربوط ردعمل کو متحرک کرتا ہے۔رپورٹ کیے گئے واقعات کے بارے میں اہم معلومات مختلف چینلز کے ذریعے پھیلائی جاتی ہیں، جن میں سوشل میڈیا، واٹس ایپ گروپس، نیوز آؤٹ لیٹس، اور عوامی اعلانات شامل ہیں۔ یہ طریقہ کار عوامی شعور اور آگاہی کو بڑھانے میں مدد فراہم کرتا ہے۔قانون نافذ کرنے والے ادارے گمشدہ یا اغوا شدہ افراد کی جلد تلاش اور تحقیقات شروع کرنے کے لیے متحرک کیے جاتے ہیں۔ ایپ کا بنیادی مقصد متاثرین کی محفوظ بازیابی کو یقینی بنانا ہے، جس کے بعد انہیں جامع مدد فراہم کی جاتی ہے۔افتتاح کے موقع پر سینیٹر اعظم نذیر تارڑ نے انسانی حقوق کے مسائل کو حل کرنے کے لیے محفوظ اور مزید ذمہ دارانہ ماحول کے فروغ میں ایپ کے کردار کو اجاگر کیا اور کہا کہ "ہم آواز ایپ کو متعارف کرانے پر فخر محسوس کرتے ہیں جو ہمارے ملک میں انسانی حقوق کے تحفظ اور انصاف کے لیے ٹیکنالوجی کے استعمال کے عزم کا مظہر ہے۔”واضح رہے کہ وزارت انسانی حقوق تمام شہریوں کو آواز ایپ ڈاؤن لوڈ کرنے اور انسانی حقوق کی خلاف ورزیوں کے خلاف مشترکہ کوششوں میں فعال حصہ لینے کی ترغیب دیتی ہے۔ ایپ فی الحال اینڈرائیڈ پر دستیاب ہے اور جلد ہی iOS پلیٹ فارم پر بھی دستیاب ہوگی۔
