بغیر ٹکٹ مسافروں سے 76 ملین روپے وصول کئے،پاکستان ریلویز

اسلام آباد۔(نمائندہ خصوصی ):پاکستان ریلویز نے چھ ماہ کے دوران بغیر ٹکٹ کے مسافروں سے 76 ملین روپے سے زائد کی رقم وصول کی ہے۔وزارت کے ذرائع نے بتایا کہ تقریباً 59,143 مسافر مختلف ٹرینوں میں بغیر ٹکٹ کے سفر کرتے ہوئے پائے گئے اور ان سے مذکورہ رقم وصول کی گئی جو محکمہ کے سرکاری بینک اکاؤنٹ میں جمع کرائی گئی ہے۔ ذرائع نے بتایا کہ یہ پہلا موقع نہیں ہے کہ بغیر ٹکٹ والے مسافروں کے خلاف بڑے پیمانے پر کارروائی کی گئی،اس قسم کے کریک ڈاؤن روزانہ ہوتے رہے ہیں۔انہوں نے کہاکہ بغیر ٹکٹ سفر کرنا غیر قانونی ہے اور جو لوگ بغیر ٹکٹ پکڑے گئے تھے ان سے جرمانے کے علاوہ ٹرین کے پورے سفر کے لیے ٹکٹ کی قیمت وصول کی گئی۔ ادائیگی نہ کرنے والوں کو ریلوے پولیس کے حوالے کر دیا جاتا ہے۔ایک سوال کے جواب میں انہوں نے کہا کہ پاکستان ریلوے پولیس نے ڈیڑھ سال کے دوران 4384 ملزمان کو قواعد و ضوابط کی خلاف ورزیوں میں ملوث ہونے پر گرفتار کرنے کا دعویٰ کیا اور ان کے خلاف ریلوے کی 8 ڈویژنوں میں ڈیڑھ سال کے دوران 3,803 مقدمات بھی درج کئے۔انہوں نےکہا کہ پشاور ڈویژن میں تقریباً 688، راولپنڈی میں 584، لاہور میں 11,03، مغل پورہ میں 369 ورکشاپس، ملتان میں 378، سکھر میں 238، کراچی میں 365 اور کوئٹہ ڈویژن میں 78 مقدمات درج کیے گئے۔انہوں نے کہا کہ ملک بھر کے تمام بڑے ریلوے سٹیشنز پر ریلوے پولیس ہیلپ ڈیسک قائم کر دیے گئے ہیں اور گزشتہ سال کے دوران ریلوے پولیس کی کارکردگی کافی تسلی بخش رہی ہے۔ریلوے پولیس کی کارکردگی کے حوالے سے انہوں نے کہا کہ پولیس محدود وسائل کے باوجود مستعدی سے فرائض سرانجام دے رہی ہے اور آئندہ سال کے دوران ریلوے پولیس کی کارکردگی کو مزید بہتر کیا جائے گا۔