اسلام آباد۔: (نمائندہ خصوصی ):جنگلی حیات کے چھ محافظوں کو مثالی کاوشوں پر قومی اعزازدینے کا اعلان کردیاگیا۔وزارت موسمیاتی تبدیلی اور ماحولیاتی رابطہ ، سنو لیپرڈ فائونڈیشن پاکستان اور صوبائی محکمہ جنگلی حیات کی مشترکہ کمیٹی نے اتوار کو یہاں پاکستان وائلڈ لائف پروٹیکشن ایوارڈز 2024کے چھ فاتحین کا اعلان کیا۔ یہ اعلان گلگت بلتستان، خیبر پختونخوا اور آزاد جموں و کشمیر میں جنگلی حیات کے تحفظ میں نمایاں 
خدمات کے اعتراف میں کیاگیا۔ اس اقدام کو برطانوی حکومت کے غیر قانونی وائلڈ لائف ٹریڈ چیلنج فنڈ (IWTCF) کی حمایت حاصل ہے۔محکمہ جنگلات وائلڈ لائف اینڈ انوائرمنٹ گلگت بلتستان کے رینج فاریسٹ آفیسر سرمد شفا نے قومی کیٹیگری میں سنو لیپرڈ ایوارڈ جیتا۔ فیضان دکھی، رینج فاریسٹ آفیسر اور کمال الدین، وائلڈ لائف انسپکٹر گلگت بلتستان جنگلات، وائلڈ لائف اینڈ انوائرنمنٹ ڈیپارٹمنٹ نے گلگت بلتستان میں تحفظ اور تحفظ کی کوششوں پر آئی بیکس ایوارڈ اور بلیو شیپ ایوارڈ جیتا۔خیبرپختونخوا وائلڈ لائف ڈیپارٹمنٹ کے دو تجربہ کار افسران وائلڈ لائف رینجر سید مصدق علی شاہ اور ڈپٹی رینجر وائلڈ لائف زاہد احمد کو بالترتیب مارخور ایوارڈ اور وولف ایوارڈ کے فاتح قرار دیا گیا۔کستوری ہرن کا ایوارڈ جان محمد ناصر، گیم واچر، جنگلات، وائلڈ لائف اینڈ فشریز ڈیپارٹمنٹ اے جے کے نے حاصل کیا ہے۔
