پاکستان پیپلز پارٹی کے چیئرمین بلاول بھٹو زرداری کا خیبر پختونخوا میں آزاد صحافت کے لیے مشکلات پر گہری تشویش کا اظہار

اسلام آباد۔(نمائندہ خصوصی ):پاکستان پیپلز پارٹی کے چیئرمین بلاول بھٹو زرداری نے خیبر پختونخوا صوبے میں آزاد صحافت کے لیے مشکلات پر اپنی گہری تشویش کا اظہار کیا ہےپیر کومیڈیا سیل بلاول ہائوس سے جاری کردہ پریس ریلیز کے مطابق پی پی پی چیئرمین نے کہا کہ خیبرپختونخوا میں صحافیوں کے خلاف پرتشدد واقعات میں اضافہ ناقابل برداشت ہے۔ انہوں نے نشاندہی کرتے ہوئے کہا کہ متاثر صحافی اپنے خلاف ہونے والے مظالم کا ذمہ دار خیبرپختونخوا کے وزیراعلیٰ سمیت صوبے کی حکمران جماعت کو قرار دے رہے ہیں۔انہوں نے کہا کہ صحافیوں پر مظالم کے ذریعے صحافت کو دبانا فسطائیت پسند گروہوں کا وطیرہ ہوتا ہے۔ چیئرمین بلاول بھٹو زرداری نے کہا کہ پی ٹی آئی آزاد صحافت سے انتہائی خوفزدہ اور عوام سے بری طرح مایوس ہے۔ انہوں نے کہا کہ اقتدار کے لیے ہمیشہ غیر جمہوری ہتھکنڈے اختیار کرنا اور سازشیں کرنا پی ٹی آئی کی پہچان ہیں۔ انہوں نے کہا کہ اقتدار کی خاطر گرنے کے لیے پی ٹی آئی کی کوئی حد نہیں۔پی پی پی چیئرمین نے کہا کہ خیبرپختونخوا میں صحافیوں پر مظالم کے خلاف پاکستان پیپلز پارٹی صحافی برادری کے ساتھ کھڑی ہے۔ انہوں نے کہا کہ ہم آزادی صحافت میں یقین رکھتے ہیں اور کسی کو صحافت کا گلا دبانے نہیں دیں گے۔ انہوں نے زور دیا کہ خیبرپختونخوا میں صحافیوں کے تحفظ اور صحافت کی آزادی کے لیے متعلقہ ادارے اور پارلیمان اپنا کردار ادا کریں۔